Shwegu mare kaba daju jung ai Hk.M.Y 602 Lagaw Dap hte Hk.L.Y 56 Lagaw Dap shara kaw Myen hypen dap gaw nbungli (2) hte gumhpraw ton 2 daram wa jahkrat ai lam chye lu ai.
Lai wa sai September praw 5 ya shani nbungli 4 du wa ai na 2 gaw shinglam la ya nna, 2 gaw gumhpraw buri jahkrat ya ai lam hpyen dap hte ni ai ginra masha langai KNG hpe tsun ai.
“Lai wa sai 2 ya laman nbungli 2 hte wa jahkrat ai gumhpraw Ton 1 daram rai na re ngu maram lu ai. dai gumhpraw du wa na she shata hkumhpa lu jaw ma ai “ga nna tsun ai.
August shata 14 ya shani kaw nna Sagaing jarit kaw myen hpyendap hte KIA pawng hpawm dap lapran majan laja lana byin nga ai majaw, Modo lam hku sa na yak ai myen hpyendap gaw, nbungli jai lang na gumhpraw jahkrat ai re nga matut tsun u.
Dai hta n-ga, ya ten Shwegu sanghpaw daru hta hpyen dap a ration sanghpaw hte hpyen laknak htaw ai sanghpaw 8 du nga nna lusha jahkrat nga ai lam chye lu ai.
Ndai gaw 2024 ning hta hpyen dap kawn Kachin State de malu masha wa sa ai lam shawng ningnan lang rai nna, ndai lang du wa ai malu masha gaw laning mi daram lusha rai nga ai lam chye lu ai.
“Madung gaw malu masha laning mi daram na re nga na lu ai” Bai nna, hpyen arung arai ni hte hpyen laknak ni wa jahkrat ai , hpyen n-gun gaw laksan nlawm ai.” nga nna buga masha langai tsun ai.
sanghpaw daru ka lusha ni htaw la tai ai shaloi hka hkin-gau mayan pat da na ginra masha ni hka de yu ai lam nami galaw ai. Sanghpaw kaji hte nga hkwi ai lam hpe mung pat hkum da ai re nga ginra masha ni thun ai.
Myen Hpyen Dap gaw, laknak htaw ai sanghpaw 2, malu masha htaw sanghpaw kaba 2, hpyen mawdaw 4 lawm nna, yawng sanghpaw li 8 hte, Mandalay Gowin sanghpaw daru kaw nna August shata lung ai lam rai nga ai.
