Majan byin ai lam n nga tim, Kokang MNDAA dap ni uphkang nga ai Sinli Mare kaba hta Myen hpyen dap maga mana yup tung ten, nbungli bawm 3 wa jahkrat bun kau da ai lam chye lu ai.
July praw 3 ya shana hkying 11 chyen daram ten hta nbungli bawm 3 wa jahkrat bun kau da ai rai tim, masha hkra hkala ai lam n nnga ai nga dai ginra na mung shawa langai KNG shiga dap de tsun dan wa ai re.
“Mana hkying 11 chyen daram hta nbungli bawm 3 wa jahkrat kau da ai, masha chyawm gaw hpa si hkala ai lam n nga ai, dai wa hkrat ang ai dum nta ni chyawm gaw tsawm ra hten mat ai, ndai kaw majan n byin ai gaw na sai, ya Lashio de bai gap hkat wa ai re nga yang gaw jahte tam wa ai she nrai i?” nga tsun ai re.
Sinli mare kaba hpe lai wa sai 2023 December shata hta Kokang MNDAA dap maga htim gasat zing madu kau ai shara rai nna, Myen hpyen dap hte Jinghku Rawt Malan Pawng Hpawm Dap ni Hai Gin myit hkrum ga sadi tawn ai hpang majan byin ai lam tsep kawp n nga mat sai re.
July praw 2 ya shana Lashio mare kaba hpe Dingdung daw pawng hpawm dap ni maga bai htim gasat wa ai hte rau, Kokang dap ni htim gasat zing madu da ai shara ni de nbungli hte bai wa gap bun wa ai lam mung rai nga ai.
Lashio mare hpe Kokang MNDAA hte pawng hpawm dap ni htim gasat nga ai hta, Lashio mare kata laknak kaba wa hkrat nna, mung shawa si hkrum ai lam ni byin nga ai re.
Dai hpawt manap Lashio Mare Daw (11) kaw wa hkrat ai hta mung shawa marai (3) si hkrum nna, Daw (9) kaw wa hkrat ai hta Kanu hte Kasha (2) bai si hkrum wa ai lam, Lashio garum ningtum hpung ni kaw na chye lu ai re.
Mani hpawt Kokang MNDAA dap maga de na gap ai laknak kaba si byuha lawk hta wa hkrat ang ai majaw, mung shawa marai (6) asak si hkrum wa sai re.
Ya ten Lashio mare hpe nhtoi 2 ya ngu na htim gasat taw nga nna, lahkawng maga laknak kaba ni hte ding yang matut manoi gap bun hkat taw nga ai re lam chye lu ai.
