Galeng Hpaji Jawng Hpe Balawng TNLA Dap Ni Hpyen N-gun Hte Sa Wa Nna Sa Hkum Pat
Kutkai Galeng mare hta hpaw sharin taw nga ai KIO asuya jawng hpe Balawng TNLA dap kaw na mana hkying 9 daram hta hpyen n-gun 50 daram hte sa wa nna, dai jawng yawng hpe sa adup pat kau ya ai nga, dai ginra na lit nga ai salang langai KNG shiga dap de tsun ai re.
June 23 ya shana hkying 9 daram hta, Balawng TNLA dap ni mawdaw 3 hte hpyen n-gun 50 daram jawng de sa wa nna, jawng wang kata hta nga taw ai jawng saranum ni yawng hpe gawt shapraw kau nna, laika sharin gawk ni ma hkra hpe hpun pyen pa hte sa gayet pat kau ya ai sha n ga, jawng shawng kaw na myusha dawng hkawn hpe mung raw mat wa ai nga ginra masha langai KNG shiga dap de tsun dan wa ai re.
“Mana hpyen n’gun hte sa wa nna, jawng kata nga taw ai saranum ni yawng hpe sa gawt shapraw kau ai, Sara Sarama ni hpe rim woi mat na hku hkyen ai, rai tim shan hte kaw ma kaji ni hte hpa hte nga yang dai hku shinggan de sha gawt shapraw kau ai, ngut na jawng gawk ni yawng hpe hpun pyen pa hte gayet pat kau da ma ai, myusha dawng hkawn mung raw mat wa ai,” nga jawng komiti na lit nga ai salang langai tsun dan wa ai re.
Galeng mare lapran tsang jawng hta Balawng TNLA dap ni Kutkai mare hpe htim gasat zing madu kau ai hpang kaw na dap jung shara jahkrat taw nga nna, mani hpawt June 23 ya shani hpaji jawng yawng hpe sa adup pat kau ya ai kaw na, Balawng dap ni mung dai shara hta n nga sai lam ginra masha ni tsun ai re.
Dai hpawt June 24 ya jahpawt jawng ma ni jawng sa taw nga ai rai tim, jawng wang yawng pat da ai majaw, jawng shawng na gaw din pa hta sha sa mahkawng jawng taw nga ai rai nna, jawng komiti na lit nga ai ni hte Balawng TNLA dap ni hkrum jahta bawng ban na matu hkyen lajang shajin taw nga ai lam tsun ai re.
Ginra masha ni hku na dai jawng hpe lai wa sai ten Myen hpyen dap naw nga ai ten kaw na dai hpaji jawng hpe Komiti jawng hku hpaw sharin taw nga sai rai tim, Kutkai mare hpe htim gasat zing madu kau ai hpang kaw na dai shara yawng shan hte hte seng ang ai majaw, shan hte hpe ahkang hpyi nna, hpaw ra na re nga, Balawng TNLA dap maga tsun ai hpe chye lu ai.
Galeng mare na hpaji jawng hpe Balawng TNLA ni a ahkang hte shan hte matsun da ai tara ni hte hpaw sharin ra na rai nna, lama shan hte na ahkang n lu ai hpaw sharin ai rai yang, rim ahkyak la mat na re lam tsun ai hpe matut chye lu ai.
Dai hpaji jawng hpe lai wa sai ten hta mung Balawng TNLA dap maga hkum pat wa sai hpe ginra masha ni yawng jawm ninghkap htu je shang nna, laika sharin taw nga ai hpe Balawng dap maga na ya na zawn kalang bai sa hkum pat wa ai mung rai nga ai.
