Waimaw Kanpaiti Mayan Na Myen Hpyen Dap 4 Hpe Htim Gasat Zing, Laga Ngam Ai Dap Shara Na Myen Hpyen Dap Ni Yawng Hprawng
June 11 ya shani Waimaw, Sadung, Kaipaiti mayan na Myen hpyen dap shara hpe KIA hte pawng hpawm dap ni htim gasat ai hta, Myen hpyen dap shara 4 hpe htim gasat zing madu kau nna, laga ngam ai mare hkan na Myen hpyen hpung BGF, Pyithutsit ni yawng hprawng mat ai re lam shawng lam hpyen shi sawk ni kaw na chye lu ai re.
KIA dap htim gasat zing madu lu ai shara 4 gaw, Sadung Myen Hpyen byuha dap, Bum Tawng Pyithutsit dap, Chihpwi lam numshe deng 13 pawng hpawm shagyit, Lahpai mare na jarit sin hpyen dap ni hpe htim gasat zing madu la lu wa ai re.
Myen hpyen dap hte BGF Pyithutsit ni hprawng mat ai shara ni gaw, N-Wan Yang Jarit Sin BGF Dap, Lukyi Jarit sin dap, Deng 19 BGF jarit sin hpyen dap, Lang Na Hka rum Myen hpyen dap, Wuraw Bum Pyithutsit dap, Na Ru Kawng Pyithutsit dap shara ni re lam shawng lam magam gun ni tsun ai re.
“Madung gaw dai ahkyak ai dap shara ni hpe sha htim gasat ai, dai ni hpe lu gasat zing ai hte laga dai mare kaji kajaw hkan na ni gaw yawng hprawng mat sai, dai hkan gaw mare sin hpyen la marai 7,8 sha nga ai, madung gaw ahkyak ai Myen hpyen dap ni hpe gasat zing la lu ai rai nga ai,” nga shawng lam magam gun hte ni nawn ai ni tsun ai re.
Ya htim gasat zing madu da lu sai Sadung Myen hpyen byuha dap gaw, lai wa sai ten English prat kaw nna, ninghkap majan a matu kring mading ngang ngang kang kang hte n lung hte gaw da ai dap shara re lam chye lu ai.
Dai mayan de na Myen hpyen dap shara ni hpe htim gasat ai hta, KIA hte pawng hpawm dap maga na, hkala nba yawm dik ai hte padang dip zing madu la lu wa ai re lam shawng lam magam gun ni tsun ai.
Ya htim gasat zing madu ai hta, Myen hpyen dap maga de na hpyen lang arung arai hte hpyen bawng nkau hpe mung KIA dap maga rim da lu ai lam chye lu ai.
Dai shara ni gaw, hpyen masa mung masa lam sha n ga, hpaga gunrai ginlen ai lam hta mung ahkyak dik ai shara ni re lam chye lu ai.
Kanpaiti lam kaba hpe pat da ai ya nhtoi shata mi hkawt du wa nga sai rai nna, Miwa langu htaw mawdaw hkying lam pat hkrum taw nga ai re.
