Waimaw Sadung Lam Lapran Na Myen Hpyen Dap Shara 2 Hpe Htim Gasat Zing Madu
Ngam Ai Shara Ni hta Majan Matut Laja Nga
Waimaw Sadung Kanpaiti lam kaba mayan na Myen hpyen dap shara 4 hpe KIA dap hte pawng hpawm dap maga htim gasat nga ai hta, dai hpawt hkying 9 daram ten du hkra rai yang Myen hpyen dap shara lahkawng hpe htim gasat zing madu lu sai nga, shawng lam hpyen magam gun ni kaw na chye lu ai.
June 11 ya jahpawt jau hkying 4 daram aten kaw na, Waimaw Sadung lam lapran na deng 13 shagyit, Bum Tawng Pyithutsit dap, Dingga hte Sadung Byuha dap ni hpe kalang dat htim gasat wa ai re.
Dai dap shara ni hpe htim gasat ai hta dai hpawt hkying 7 chyen daram hta Bum Tawng pyithutsit dap hpe htim gasat zing la lu sai rai nna, hkying 9 daram hta gaw, Chihpwi lam numshe na deng 13 shagyit hpe bai lu gasat zing wa ai nga, shawng lam gagam gun hte ni nawn ai salang langai KNG shiga dap de ndai zawn tsun shateng wa ai re.
“Gawset Yang lahta Chihpwi lam numshe na deng 13 shagyit hpe gaw hkying 9 daram hta lu zing sai, Bum Tawng hpe gaw hkying 7 chyen daram hta lu zing kau sai, ya laga ngam ai dap shara ni hpe gaw matut htim gasat taw nga ding yang re,” nga tsun dan wa ai re.
Matut na Sadung Byuha dap hte Dingga Myen hpyen dap shara ni laja lana matut htim gasat taw nga ai zawn, Myen hpyen dap maga na nbung li holicopter ni hte mung wa gap bun nga ai lam ginra masha ni tsun ai.
Dingga Yang dap shara hpe lai wa sai shata hta KIA dap maga htim gasat kau sai rai tim, Byinbu Kawng, Wahtau Bum, hte Dingga Yang hkan na Myen hpyen hpung ni gaw dai makau hkan makoi rawng taw nga ai kaw na, Dingga yang dap shara hta bai n htang wa nga taw ai majaw, dai hpawt kalang bai htim gasat ra ai re lam shawng lam magam gun ni tsun ai.
Sadung byuha kawng gaw, dai mayan tsaw dik bum hta nga ai dap shara rai nna, dai makau grup yin yawng hpe makawp da lu ai dap kaba re lam chye lu ai.
Ya na zawn ahkyak ai dap shara hpe KIA dap maga laja lana htim gasat taw nga ai hta Myen hpyen dap maga na laknak kaba ni hte makau grup yin de gap sharu bun nga ai re.
Chihpwi lam num she na deng 13 shagyit hta Myen hpyen dap ni kaw na, lai sa lai wa mung mare masha ni hpe laja lana san jep, gumhpraw hta sha taw nga ai shagyit sha n ga, Miwa mung masha ni hpe tara n shang lagu shalai, gumhpraw hkrup mara hta sha taw nga ai shagyit re lam matut chye lu ai.
Dai shara hpe KIA dap maga na drone hte sa htim gap gasat na hpe hkrit tsang ai majaw, myen hpyen dap ni nga ai ntsa de, Pite ni grang da nna, nga ai dap shara re lam mawdaw la ni tsun ai re.
Bum Tawng dap shara gaw, Waimaw Kanapaiti lam mayan hta ahkyak ai dap shara rai nna, dai dap shara hta Myen hpyen dap hte Pyithutsit ni pawng hpawm nna, dap jung ai dap shara re lam chye lu ai.
Ya ten KIA dap maga Jinghpaw mung na Myen hpyen dap shara law law hpe htu shadut htim gasat taw nga ai hta, ndai June shata praw hta Sadung Kaipaiti mayan na Myen hpyen dap hpe htim gasat wa ai rai nga ai.
Ndai laman Waimaw mare kaba makau grup yin ni hta hpyen masa shaja hkat ai lam ni ding yang byin taw nga nna, laknak kaba gap shadam bun ai lam ni hpe shana shagu galaw taw nga ai lam chye lu ai.
