Pangwa ginra hta Ga Sau nhkun gyi ru hkrat wa ai hta bungli galaw masha marai 20 ram si ai hta, dai ni nhtoi 4 ya na ai du hkra moi mang 5 hpe sha naw tam mu ai lam ginra masha ni kaw na chye lu ai.
June praw 4 ya jahpawt hkying 9 daram hta Pangwa kaw na deng 5 daram tsan ai, Ga Sau htu dabang masat masum hta, bum gyi ru hkrat wa ai majaw, dai kaw bungli galaw nga ai masha marai 20 daram asak si sum wa ai lam chye lu ai.
Ya na zawn Ga Sau nhkun gyi ru ai hta masha marai 20 ram si ai rai tim, ya ten du hkra marai 5 hpe sha naw mu ai majaw, matut tam ai lam galaw nga ai nga dai ginra na mung shawa langai KNG de tsun dan ai re.
“Marai 20 ram lawm mat ai, ya du hkra rai yang marai 5 sha naw mu ai, law malawng hpe gaw rai n mu shi ai, dai majaw naw matut tam taw nga ai, ya mu tam ai gaw, Back Hold gau ai Miwa la 2 hte Myen mung bungli galaw masha marai 3 hpe sha naw mu tam da ai,” nga tsun ai re.
Dai ga gyi ru hkrat wa ai hta, dai makau kaw gat dut taw nga ai Sawlaw mare na asak 19 ning re ai Shy Dau Nan mung lawm mat ai rai nna, laga si hkrum ai yawng gaw, La ni hkrai re lam chye lu ai.
Ya na zawn Ga sau n hkun gyi ru nna, bungli galaw masha ni asak si sum ai lam hpe line n tsa de vedio gayet mara ai ni hpe Miwa company ni kaw nna, jahkrit sharim ai lam ni galaw taw nga ai lam chye lu ai.
Ndai lam hte seng nna, shiga dap ni de n du na matu miwa company ni grai shakut taw ai rai tim, ya na zawn shiga dap ni de du mat ai majaw, dai shiga jaw ai ni hpe hkan jep sa gawn taw nga ai sha n ga, Company wang de mung gadai hpe n jaw shang ai re lam chye lu ai.
Ya na zawn bum gyi ru hkrat wa nna, ga sau nhkun hte hpawn bungli galaw masha yawng gyi kaput si ai lam gaw, ndai kalang law dik re lam chye lu ai.
Ndai laman, Nmai hka hku hte Chihpwi Pang Wa maga ni de shani shana marang htu kaba taw nga ai majaw, bum gyi ru hkrat nna, hka tung kaba ai lam ni byin taw nga ai re.
