Manmaw mare kaba hta Myihprap Wan sumri lagu rep di ai sha n ga, nta kata na hka chyup jak, hte dut sha mai ai arung arai yawng hpe hkan lagu taw nga ai lagut lahkawng hpe mung shawa ni lu rim da ai lam chye lu ai.
Manmaw muklum kata hta ndai laman Wan sumri hkan lagu rep dut sha taw ai, lagut grau grau law wa taw nga nna, nta kata na hka chyup jak ni du hkra hkan lagu shaw hkawm taw nga ai re.
Ya na zawn wan sumri hkan lagu rep dut sha taw nga ai lagut lahkawng hpe May 19 ya jahpawt jau hkying 4 daram hta mung shawa ni jawm lu rim da ai re lam chye lu ai.
Ya na zawn Wan sumri lagu rep dut sha taw ai ni gaw, shani rai yang hkan lagyim yu da nna, shana yup tung ten ni hta hkan lagu rep la taw nga ai nga dai ginra na mung shawa langai KNG shiga dap de tsun dan ai re.
“Dai lagut ni gaw, shani ka-ang ten, bu kawp maza hkan hta ai zawn rai hkan lagyim yu da nna, galoi ten masha nga n nga yawng yu ngut da ai hpang, shana yuptung ten hte jahpawt maga hkan lagu hkawm taw ai re,” nga tsun dan ai re.
Dai lagut lahkawng gaw, Manmaw Pauk Kung lawk shara 4 ram kaw na wan sumri lagu na wa ai kaw hkap lu rim da ai re nga tsun ai re.
Lai wa sai 10 ya ram hta mung Manmaw Namhpa lawk na nta ni hta Hka chyup jak sa lagu ai lagut marai 3 hpe mung, mare masha ni hkap lu rim da ai lam chye lu ai.
Ya na ndai lagut ni gaw, nta kata na mu mamu rai lagu ai sha n ga, lagu na hpa n nga mat yang, Wan Sumri hte hka chyup jak mawtar ni yawng hkan lagu taw ai ni re lam chye lu ai.
Dai lagut ni hpe Manmaw Balik dap de ap kau ai rai tim, tara jewat na masha n nga ai majaw, bai mi daram na ai hte bai dat kau ai lam chye lu ai.
Manmaw mare kata hta hpyen majan masa lam a majaw, ginra masha ni yawng hprawng yen mat ai ten, lagut ni kaw na ya na zawn dan dan leng leng hkan lagu hkawm nga ai mung rai nga ai.