Sinli Mare Kaba Hotar Lawk Na Jau Nta Hpya Taw Nga Ai Ten Laknak Kaba Si Kapaw La Nna Mung Shawa Langai Si, Langai Hkala Hkrum
Mungmyit Sinli, Sinli mare kaba Hotar mare na Jau Nta langai hpya na matu bungli galaw taw nga ai ten, majan ten laman na n-kapaw ngam taw ai 60 mm laknak si langai hta kapaw la ai majaw, dai kaw bungli galaw nga ai la shabrang langai asak si nna, laga ngam ai langai mung hklala hkrum wa ai re nga, dai ginra na mung shawa ni kaw na chye lu ai.
May praw 6 ya jahpawt hkying 11 aten daram hta, Majan ten laman laknak kaba si a majaw, hten mat ai Jau Nta hpe run kau na matu, bungli galaw taw nga ai ten, laknak daw hta kabai dat ai kaw na kapaw hkrum wa ai re nga, dai ginra na mung shawa langai KNG shiga dap de ndai zawn tsun dan wa ai re.
“Hotar mare kaw rai nga ai Jau n’ta run ai kaw she, 60 mm baw daw n kap mat sai, dai hpe shan hte hta la nna, shan hte mung n kapaw mat sana re ngu she n shadu ai dawng, dai hpe hta la na kabai dat, ya si hkrum ai wa mung hkrit na layit hte hta gayet dat ai nga yang, kapaw wa ai rai nga ai.” nga tsun dan ai re.
Laknak kaba si kapaw wa ai hpang, hkala hkrum ai yan lahkawng hpe kalang dat tsi rung kaba de woi mat ai rai tim, langai wa gaw, tsi rung du ai hpang, asak si sum mat nna, laga langai mung hkala sawng wa ai re.
Jau N’ta gaw, Majan byin wa ai majaw hprawng shakram da ai dum nta gaw majan ten laman laknak kaba si a majaw, yawng hten hkrum mat ai majaw run kau shangun ai ten ya na zawn byin wa ai re lam matut tsun dan wa ai re.
“Wa Jau gaw n nga sai, wa jau nta wa gawan yu ai shaloi nga n mai mat sai le, yawng malawng mala byin mat sai le, shaloi dai nta hpe yawng run kau shangun ai, ya run kau shangun ai mung Kahtawlik hpung masha sha, lak sama wa hpe puk pyet gade nga jaw nna, run shangun ai rai nga ai, dai run kau shangun ai kaw ya si hkala hkrum ai yan နေ့စား sa galaw ai rai nga ai.” nga matut tsun dan wa ai re.
Dai yan gaw, Kaung Haw mare na asak 18 ning ram re ai ramma la kasha yan rai nna, Jau nta hpya ai hta, နေ့စား bungli sa shang galaw ai ten si hkala hkrum wa ai rai nga ai.
Sinli mare kaba hpe Kokang MNDAA dap maga lai wa sai 2023 November shata hta htim gasat zing madu da ai shara rai nna, mung shawa yawng dum nta bai n htang wa sai rai tim, Kokang dap maga na bawm jasan ya ai lam ni hpa mung rai n galaw shi ai re lam chye lu ai.
Sinli mare na mung shawa ni yawng mung dum nta gram gaw gap ai lam ni hpa rai n galaw shi ai sha, laknak kaba ni a majaw hten mat ai dum n ta ni hta sha, dai hku matut rawng taw nga ai nga ginra masha ni tsun ai re.
Mungmyit Sinli mare kaba law malawng hpe Kokang MNDAA dap maga up madu da ai rai nna, dai ginra ni hta bawm kapaw la ai amu manghkang lam ni hpe jahkring hkring naw byin nga ai re.
