Putao ginra hta Jak sau dum hprut taw sai majaw, Jak sau ni hpe Mawdaw lam kaba hku na htaw shalai na matu, KIA dap maga, Myen hpyen dap hpe jahkrup bawng ban yu ai rai tim, Myen hpyen dap maga na n hkap la ai lam chye lu ai.
Ya ten Putao ginra hta jak sau dum hprut mat ai majaw, mung shawa ni hpyi shawn wa ai hpe, KIA dap maga lit la let Myen hpyen dap hpe jahkrup bawng ban ai rai tim, Myen hpyen dap n hkap la ai sha, nbungli hte htaw lahka ya na re nga, Jinghpaw Mung Myen hpyen hkringmang Slg Hkyet Hting Nan sa tsun ai nga ginra masha langai KNG de tsun dan wa ai re.
“Shanglawt ni gaw, Mung shawa ni jak sau grai yak ai majaw mawdaw hte htaw na hku Myen hpyen dap hpe jahkrum ai n hkraw ai da, Jet Nbungli hte htaw lahka ya na nga na Slg Hkyet Hting Nan shi nan sa nna sa tsun mat ai,” nga tsun dan ai re.
Jinghpaw Mung Myen hpyen hkring mang Slg Hkyet Hting Nan April 28 ya shani Putao de lung nna, ginra masha ni hte hkrum shaga ai lam hta sa tsun mat wa ai re.
Ya na zawn Myen hpyen dap maga nbungli hte htaw lahka ya na ngu hpe ginra masha ni maga n mai byin ai nga matut tsun maram tawn ai re.
Myitkyina Sumprabum lam kaba hpe lai wa sai March 9 ya shani kaw na pat kau ai gaw, dai ni shata mi chyen na wa sai rai nga ai.
Ya ten Putao ginra hta Dat si tau mi 20000 daram hte mari lang ra taw ai rai tim n dai laman dut jaw ai ni gadai n nga mat sai lam chye lu ai.
