Myitkyina Htawng kaba kasu kabrawng byin ai hpang, dai htawng kaba na lit nga ai marai 5 hpe Myen hpyen dap kaw na sa shaga rim woi mat ai lam, နိုင်ငံရေးအကျဉ်းသားများကွန်ရက်(PPNM) wuhpung ni kaw na chye lu ai re.
April 17 Myen shaning ningnan shani hta bawng masha dat ya ai lam hta tara rap ra ai lam n nga ai majaw nga nna, hpang shana maga htawng kata hta n-gun madun ai lam byin wa sai re.
Dai zawn htawng kata kasu kabrawng byin wa ai hpang, Myen hpyen dap hte Balik ni kaw na sinat gap bun ai majaw, bawng masha marai 5 si hkrum wa nna, marai 8 hkala hkrum wa ai re.
Htawng kata dai zawn kasu kabrawng byin ai hta lit nga ai ni ngu maram lu ai htawng magam gun marai 5 hpe Myen hpyen dap laksan sawk jep sagawn hpung ni kaw na, April 24 ya shani htawng kaw na sa rim woi mat ai rai nga ai.
Htawng kasu kabrawng byin wa ai ten, sinat hte gap sat ai hpyen dap hte Balik ni hpe ahkyak la na malai, npu tsang na htawng magam gun ni hpe mara sha-gun ai re lam PPNM na lit nga ai ni KNG de n dai zawn tsun dan wa ai re.
“Mazut gumshem ai lai ladat hte sinat gap bun wa ai Myen Hpyen dap hte Balik ni hpe gaw san jep ai lam n galaw na, prat tup yawng a yu kaji hkrum da ai htawng magam gun ni hpe mara shagun mayu ai lam re,” nga tsun ai.
Myen hpyen dap sinat gap ai hta hkala hkrum ai marai 8 kaw na langai rai nga ai Shd Ying Bawm mung htawng kasu kabrawng byin ai hpang 3 ya hta asak si sum wa sai re.
Myen hpyen dap n pu Htawng magam dap, Balik, Hpyen dap ni kaw na ya na zawn tara upade hpe tawt lai nna, gap sat ai lam hte npawt rudi hpe a tsawm sagawn na malai laknak hte hparan ai lam gaw, shinggyim ahkaw ahkang tawt lai ai lam ni re nga, shinggyim ahkaw ahkang wuhpung ni kaw na madi madun da ai re.
Ya ten Myitkyina Htawng kaba hta kasu kabrawng shabyin ai lam hta shang lawm ai ngu shadu ai marai 19 hpe n sin htawng kata sharen da ai rai nna, Htawng kata na mara dam matut shagun na hkyen taw nga ai re.