Kamaing hte Nam Ya mare lapran, Jahkrau Loi Seng Mare Tawar tai kawng ntsa hta dung ai Myen hpyen hpung ni, Majan byin ai lam n nga ai sha, dai dap shara na hprawng yen mat sai nga, shawng lam magam gun ni tsun ai re.
Loi Seng mare Tawar Tai kawng ntsa hta dap jung nga ai Myen hpyen n-gun marai 10 daram gaw, dai hpawt manap jau dai shara kaw na hprawng yen mat sai nga, dai ginra na shawng lam magam gun langai tsun dan ai re.
“Hkrit na yawng hprawng mat ai ga rai nga ai, ndai kaw na hprawng yu wa ai ni yawng Kamaing Myen hpyen dap de gahkyin mat sai, anhte maga na ni dap jasan ai lam galaw taw sai,” nga tsun ai re.
Ya na zawn Myen hpyen dap hprawng pru mat wa ai hpang, KIA dap maga dai shara hpe sa jasan jaseng ai lam ni galaw taw sai nga tsun ai re.
Matut na rai tim, Myitkyina mare numshang na Ake Myen hpyen dap hpe KIA dap maga laknak kaba sa gap bun ai majaw, dai dap shara dap up dukaba hte hpawn laga hpyen ma marai 6 asak si ai nga, hpyen hte seng ai shiga lawk ni hta tsun da ai re.
Ndai zawn rai Ake Myen hpyen dap sa gap ai hta Myen hpyen dap up dukaba hte hpyen ma marai 6 si hkrum ai lam hte seng nna, KNG maga laksan shateng lu ai lam n nga ai re.
Jinghpaw mung kata Myen hpyen dap shara ni hpe KIA htim gasat zing madu taw nga ai gaw dai ni ten du hkra matut noi gasat shamyit taw nga ding yang rai nga ai.
