Danai Lapu Hka Ja Maw hte, Payin maw lapran na Noi Je Bum Myen hpyen dap hpe Wunpawng Mungdan Shanglawt hpyen dap KIA htim gasat zing madu kau lu sai lam chye lu ai.
Noi Je bum hta dap jung ai Myen hpyen dap Hk.L.Y 297 dap shara hpe KIA Dapba 2 hte Dung 14 ni dai hpawt manap hkying 6 kaw na htim gasat ai, shani hkying 10 ram hta tsep kawp htim gasat zing madu kau lu sai nga, Dung 14 na lit nga ai shawng lam magam gun ni KNG shiga dap de tsun dan wa ai re.
“Majan byin ai gaw hkying hkum masum ram sha re, hkying 10 daram hta yawng zing madu kau lu sai, dap shara grai wa kaba hkra gaw nre shawng lam dap shara madung payin maw ginra hpe yu madu ai dap shara rai nga ai,” nga tsun ai re.
Noi Je Bum Myen hpyen dap hta hpyen n-gun 30 daram nga ai rai nna, lai wa sai 2015 ning kaw nna, wa du dap jung ai re lam chye lu ai
Dai dap shara gaw, madung Payin maw ginra hpe yu madu taw nga ai dap shara rai nna, dai dap shara hta lai sai shaning hkan na zawn hpyen n-gun n law mat sai nga maw ginra masha ni tsun ai re.
Ya zing madu kau lu ai Noi Je Bum hpe, maw ginra masha ni gaw, Payin Bum, Ye Kan Bum nga na mung shaga ai sha ra re lam chye lu ai.
Dai dap shara hpe KIA htim gasat zing madu kau ai, hkying hkum mi daram na ai hpang, Myen hpyen Jet Fighter nbungli hte bawm wa jahkrat bun wa ai re lam chye lu ai.
Noi Je Bum hte Payin maw grup yin ni hta, lai wa sai ten KIA up hkang ai ginra rai nna, 2015 ning hta Myen hpyen dap kaw na, Nay Mye Shin Lin Ye gabaw hte dai ginra majan kaba hpaw nna, zing madu kau ai dap shara mung rai nga ai.
Dai dap shara hta, Jahtu Zup mare daju Myen hpyen dap Hk.L.Y (297) a shawng lam dap shara hku na masat tawn da ai dap shara mung rai nga ai.
Noi Je Bum hta matut nga ai Nam Kawn dap shara hpe mung lai wa sai March 18 ya shani KIA Dung 14 ni htim gasat zing kau sai re.
Danai Lapu Hka Ja Ja maw, Nga ga, Nam Kawn, hte Loi Je Bum shara ni hta hta Myen hpyen dap shara jahkrat da ai rai nna, dai shara 4 kaw na 2 hpe KIA htim gasat zing madu kau lu sai rai nga ai.
Ya matut naw ngam ai Lapu hka hte N-ga ga na dap shara lahkawng naw ngam ai rai nna, dai dap shara ni hpe ndai laman htim gasat na masa nga ai lam ginra masha ni matut tsun da ai re.
