Mungmyit Sinli Kutkai Kawng Hka mare na, Wunpawng La langai hpe Kokang MNDAA dap maga rim zingri sat kau nna, hpa lit mung nla ya ai nga, ginra masha ni kaw na chye lu ai.
Lai wa sai March praw 6 ya shani Kawng Hka mare bum yi galaw taw nga ai salang langai gaw, shi nga lai wa ai mare de mam n li wa la nna, bai n htang wa ai ten lam lapran kaw MNDAA dap ni hkap san jep ai hta ya na zawn sat hkrum wa ai re nga ginra masha langai KNG de ndai zawn tsun dan wa ai re.
“Shi gaw shi nga lai wa ai mare de Mam n-li wa la nna, bai nhtang yu wa ai ten Kokang dap ni hkap san jep ai ten shi Na a tsawm nna ai majaw, hpa mung bai nhtai re nga yang, dai gaw adup zingri na lata shalai kau ai re nga tsun ma ai,” nga tsun ai re.
Ya sat hkrum ai wa gaw, asak 34 ning re Slg Zau Seng ngu ai wa rai nna, shi hta myit ningma nga ai hte, na tsan ai wa re nga ginra masha ni tsun ai re.
Sat hkrum ai Slg Zau Seng a moi mang hpe Kokang MNDAA dap maga sat makoi kau ai hpe, mare masha ni hku na, April praw 2 ya shani bai wa htaw shaw la nna, a tsawm sha bai lup makoi sai lam chye lu ai.
Ya na zawn n tara sat hkrum ai lam hte seng nna, nawku hpung ningbaw ni hte mare masha ni hku na, Kokang MNDAA dap maga de wa san yu ai shaloi shawng kalang hta gaw, san jep ai ten lata shalai kau ai re nga tsun nna, hpang kalang hta bai rai yang, Kokang hpyen la ni hpe lata du wa ai majaw, gap sat kau ai re ngu na bai tsun wa ai nga ginra masha ni matut tsun ai re.
Ndai lam hte seng na lit la ya let bunglat hka wa ya na matu tsun ai rai tim Kokang dap maga n lu jaw ai lam bai nhtang tsun ai nga, tsun ai re.
Kokang MNDAA dap ni kaw na ndai zawn mara kata mung shawa ni hpe majoi hkrup mara zing ri sat ai lam ni a majaw, dai ginra hta nga ai mung mare masha ni kaw na galoi mung hkrit myit ni hta nga taw ra ai lam tsun ai re.
Slg Zau Seng gaw, asak 70 ning daram re Kanu dinggai hte asak 7 ning hte 2 ning re kasha lahkawng hpe tam jaw taw nga ai wa re lam chye lu ai.
