Manje hte Shwegu mare kaba lapran Han Htet Myen hpyen dap hpe KIA dap maga, April praw 3 ya shana hkying 7 daram kaw na htim gasat taw nga ai gaw ya ten du hkra majan matut manoi gap gasat hkat taw nga ai lam chye lu ai.
Han Htet mare gaw, Man Je mare kaw na Shwegu hte Mandalay yu wa ai lam numbraw hta dap jung tawn ai Myen hpyen dap shara rai nna, hpyen masa lam hta ahkyak ai dap shara re lam matut chye lu ai.
Ya ten dai shara hta majan laja lana matut gap gasat hkat taw nga ai lam hte seng nna, shawng lam magam gun langai KNG de ndai zawn tsun dan wa ai re.
“Dap shara hpe rai n lu zing shi ai, ya du hkra lahkawng maga matut gap gasat hkat taw nga ai, dai ni mung shani tup laknak kaba hte gap gasat hkat taw nga ai, Myen hpyen dap maga Y-12 nbungli hte sa gap bun taw nga ai,” nga tsun dan wa ai re.
Dai dap shara hpe htim gasat nga ai ten, Myen hpyen dap maga na nbungli hte sa gap bun ai lam ni nga taw ai hpe chye lu ai.
Majan gap gasat hkat wa ai majaw, dai ginra na mung shawa law malawng hprawng yen taw nga nna, laknak kaba nbungli bawm a majaw, mung shawa dum nta hten hkrum ai lam ni
Maji Gung Myen hpyen dap kaba hte Jehkam Myen hpyen dap kaba hpe htim gasat zing madu kau ai hpang, Mung Hkawng, Namlim Pa mayan na Myen hpyen dap yawng hprawng pru mat sai re.
Dai mayan na hprawng pru wa ai Myen hpyen hpung nkau, Han Htet mare na hpungkyi jawng ni hta wa nga taw ai majaw, KIA dap maga tsun sadi jaw ai rai tim, yen ai lam n nga ai majaw, ya na zawn sa htim gap gasat wa ai re nga, shawng lam magam gun hte ni nawn ai ni tsun ai re.
Ya ten KIA dap maga Manje, Manmaw, Nmawk ginra ni hpe htim gasat hkyen taw nga ai hta, Han Htet mare gaw, ginra masa hta ahkyak ai shara langai rai nga ai.
Dai ginra mayan hta ndai laman hpyen masa shaja hkat ai lam ni a majaw, ginra masha n kau tinang man ang ai shara ni de hprawng yen taw nga ai re.
