Hpakant Mashi Kahtawng Happy KTV kaw na pru wa ai Myen hpyen hpung ni hpe, KPDF dap maga lam lapran hkap shingla gasat ai hta, Myen hpyen dap maga hkra machyi ai lam nga ai nga, KPDF dap maga tsun ai re.
April praw 2 ya shana Happy KTV hta nhtoi hkren pyaw len nna, pru wa ai Myen hpyen mawdaw 3 hpe April praw 3 ya jahpawt hkying 5 daram hta lam lapran kaw hkap gap gasat ai hta hkra hkala ai lam nga ai nga KPDF na lit nga ai ni KNG shiga dap de tsun dan ai re.
“Happy KTV na pru wa ai Myen hpyen mawdaw 3 hpe hkap gasat ai, mawdaw gaw hten mat ai, masha si hkala ai lam nga n nga chyam a tsawm n chye ai, dai hpang minute 20 daram lahkawng maga jahkring gap gasat hkat na, anhte maga htingnut mat sai,” nga tsun dan ai re.
Ya na zawn hkap shingla gasat ai hpang, lahkawng maga minute 20 daram gap gasat hkat wa ai lam nga nna, myi mu wa ai hte rau, KPDF dap maga bai hting nut mat wa ai nga tsun ai re.
Myen hpyen hpung hkap gasat hkrum wa ai hpang, dai mayan hta hkawm sa hkawm wa mung mare masha ni hpe san jep ai lam ni galaw wa ai re.
Hpakant Mashi Kahtawng Happy KTV hta lai wa sai 2023 ning April 23 ya shani hta mung, Myen hpyen Dukaba langai hte hpawn marai 5 gap sat hkrum wa sai re.
