Majan Lapran Pat Hkrum Ai Hka Wan Ban Mare Masha Ni Nmawk Hpyen Yen De Du

Sinlum bum makau grup yin na hprawng yu wa ai Myen hpyen hpung ni hpe hkap shingla gasat ai kaw na, Hka Wan Bang mare makau grup yin hta majan laja wa nna, mung shawa nkau pat hkrum wa ai re.

April praw 4 ya jahpawt Sinlum maga de na hprawng yu wa ai Myen hpyen hpung ni hpe KIA hkap shingla gasat ai kaw na lahkawng maga majan byin wa ai hta, Myen hpyen dap maga nbungli hte bawm sa jahkrat bun wa ai majaw, majan laja wa ai re.

Dai zawn majan lapran mung shawa n kau pat hkrum wa ai rai nna, dai hpawt jau yawng bai lawt pru wa sai hte Nmawk hpyen yen hta du nga sai lam, dai ginra na mung shawa langai KNG shiga dap de tsun dan ai re.

“Myen hpyen dap ni mani hpawt nbungli bawm hte mung sa jahkrat ai, lahkawng maga gap mung gap hkat ai, mung mare masha ni gaw dai lapran kaw pat hkrum wa ai rai nga ai, dai hpawt she nmawk de pru wa lu na shat lu sha ai,” nga tsun dan ai re.

Sinlum bum mayan na Myen hpyen dap ma hkra hpe KIA htim shagrawt kau lu sai rai tim, Y-12 nbungli hte bawm wa jahkrat ai lam ni ding yang matut naw byin taw nga ai lam tsun ai re.

Dai hpawt manap jau Hka Wan Bang mare na mung shawa ni gaw Nmawk mare Nawku jawng wang hte ni nawn ai hpungkyi jawng wang ni hta hprawng yen taw nga ai lam chye lu ai.

Mung mare masha ni pru mat wa ai hpang, dai hpawt hkying 9 daram hta, dai ginra mayan hku Y-12 nbungli hte bawm sa sharut bun wa ai hta mung shawa marai 3 hkala hkrum wa ai lam chye lu ai.

Myen hpyen dap maga na ya na zawn nbungli laknak kaba hte gap bun ai majaw, mung shawa dum nta law law hten hkrum taw nga sai re.

Ya ten Myen hpyen dap gaw, Nmawk makau grup yin ni hta hpyen n-gun kaba jahkrat na nga taw ai majaw, dai ginra hta majan matut laja wa na masa nga ai lam ginra masha ni matut tsun ai re.

Nmawk mare hte Deng 5 daram sha tsan ai Hka Wan Bang mare na Udang bum Myen hpyen dap hpe KIA dap maga April praw 2 ya shana htim gasat zing madu kau sai re.

Hka Wan Bang mare hta nta hting gaw 160 daram nga ai mare kaji langai rai nna, dai mare hta Myen hpyen dap kaw na Loi Je Miwa hkran de lai na mawdaw ni hpe hkawn kang hta ai shagyit kaba jahkrat ai shara mung rai nga ai re.