Jinghpaw Mung, Myitkyina Mare kaba daju, Dingdung daw Myen hpyen dap daju Taimu Dukaba Aung Zaw Htwe hte hpawn Danai, Mogaung na Dukaba marai 3 hpe Holicopter hte rim woi mat nna, Naypyidaw hta san jep taw nga ai lam Myen hpyen dap hte ni nawn ai ni kaw na chye lu ai.
Jinghpaw Mung Taimu hte hpawn Danai D.K.Ts Mu hte, Moagaung Ts.K.Hk mu ni hpe, lai wa sai masum ya ram hta Holicopter nbungli hte wa woi mat nna, Naypyidaw dap shara langai hta rim woi da let, san jep taw taw nga ai rai nna, shan hte masum hpe madung san jep ai gaw, Majan lam, Bawm Yam manghkang hte Jak sau mang hkang ni re lam sagawn chye lu ai.
Ya ten Myen hpyen dap gaw, Jinghpaw mung shara shagu hta majan sum taw nga nna, dap shara langai hpang langai tat sum taw nga ai re.
Hpakant Lung Seng Maw hte Danai Ja Maw ginra ni de n tara ai Bawm yam hte jak sau ni hpe htaw shalai ahkang jaw ai majaw, Sagaing PDF hte KIA dap ni hpang de bawm yam ni du mat ai majaw nga nna, lai wa sai ten na Taimu ni mung rim ahkyak la hkrum wa ai re.
Ya na Taimu Dukaba Aung Zaw Htwi a shawng na Dukaba Soe Hlaing mung Jinghpaw mung Taimu shata 9 hte htawt sit hkrum mat ai rai nna, shawng na Taimu Myet Thet Oo hte Ko Ko Mg ni mung rim ahkyak la hkrum wa sai re.
