Nmawk hte Loi Je Lapran na Myen hpyen dap yawng hpe htim gasat zing madu kau ngut ai hpang, Nmawk mare kaba de hpyen masa bai shaja hkat wa ai majaw, dai ginra na mung shawa yawng ngu na daram hprawng yen taw nga sai re.
Nmawk mare kaba hpe htim gasat zing wa na masa nga ai majaw, mare kata nta sin na marai 1,2 sha tawn da nna, laga ngam ai law malawng yawng gaw tinang man ang ai shara ni de hprawng yen ma sai nga, Nmawk ginra masha langai KNG shiga dap de tsun dan ai re.
“Ya hte Sinlum Myen hpyen dap hpe zing kau ai hpang kaw na mi gaw ndai kaw na ni yawng hprawng yen ma sai, nkau law malawng gaw, Nba Pa, Mai Ja Yang maga de law ai, Manmaw maga de hprawng ai ni mung nga ai, yawng gadai mung gadai chye ai hku rai sa ga rai nga ai, n’ta kaw gaw n’ta sin na marai 1,2 sha nga sai,” nga tsun dan ai re.
Sinlum Bum kaw na hprawng yu wa ai Myen hpyen hpung ni hpe, mare makau grup yin hpring hkra shim lam la ya nna, sa tau la taw ai lam chye lu ai.
Nmawk mare kaba hta ya ten Myen hpyen dap ni gaw, Hpaji Jawng hte mung shawa ni nga ai mare makau ni hta shara la nna, shim lam shagreng taw nga ai re.
Nmawk mare kaba na mung mare masha ni gaw, Mai Kung, Sha It Hku, Dingsing Pa, Nba Pa mare ni de hprawng yen taw nga ai ni nga ai zawn, laga nam maling de hprawng yen ai ni mung nga taw ai re.
Sinlum bum Myen hpyen dap kaba hpe htim gasat zing madu kau ngut ai hpang kaw na, Nmawk, Man Maw, Maje mare kaba hkan na mung mare masha ni gaw, bum de hprawng yen taw nga ai mung rai nga ai.
Ya ten Nmawk mare kaba makau grup yin shara ni hta Wunpawng Mungdan Shanglawt Hpyen dap KIA hte pawng hpawm dap ni shara la taw nga nna, ndai laman majan kaba byin wa na masa nga ai lam ginra masha ni tsun maram da ai re.
