Sumprabum Myen Hpyen Dap Kata Lu Sha Wa Jahkrat Ya Ai Hpe KIA Dap Maga Zing La Lu
Lusha yak hkak wa taw nga ai Sumprabum Myen hpyen dap de nbungli kaw na malu masha wa jahkrat ya ai hpe, KIA dap maga zing la lu ai lam chye lu ai.
March 24 ya shana maga nbungli kaw na wa jahkrat ya ai malu masha buri hta hkausoi jahkraw, ရှူးရှဲ, Hka yawm, N-gu, hte laga nga jahkraw hte kalang ta sha mai ai baw si mai si maw ni re lam chye lu ai.
Ya na zawn majan chyinghkraw galu wa ai hte rau, Myen hpyen dap malu masha yak hkak dum hprut wa nna, nbungli hte malu masha wa jahkrat ya ai lam ni nga taw ai re.
Dai jahpawt hta sha, Sumprabum Myen hpyen dap hpe KIA dap maga, Drone laknak kaba ni hte sa gap bun ai hpang, hkying hkum mi jan hte, Myen hpyen dap maga nbungli hte bai wa gap bun wa ai lam shawng lam magam gun ni kaw na chye lu ai.
Myen Hpyen dap maga, Sumprabum dap shara hpe ntat sum hkra, shani shagu nbungli hte ninghkap shingla gasat taw nga ai hta, dai hpawt manap mung Jet Fihter nbungli lahkawng hte wa gap bun kau da ai lam shawng lam magam gun langai tsun ai re.
“Dai hpawt mung anhte maga Drone laknak kaba gap bun nna, shang htim gasat na hku hkyen ai, jahkring nga hte nbungli bai du wa na dai masing mhpe jahkring kau ra ai,” nga tsun ai re.
Ya ten Myen hpyen dap gaw, Sumprabum dap shara ntat sum hkra, Y-12 nbungli, Jet Fighter nbungli ni hte wa gap gasat taw nga ai sha n ga, Rawang Pyithutsit dap ni mung ning hkap shingla gasat garum taw nga ai re.
Ya ten Sumprabum Myen hpyen dap hpe KIA dap maga, wang da let htim gasat taw nga ai gaw, nhtoi 17 ya na wa nga sai re.
Majan nhpan a majaw, Myitkyina Putao lam kaba pat taw ai nhtoi aten na wa ai majaw, Putao ginra hta Jak sau hte sau shakau ni dum hprut wa nga ai zawn, gun rai manu ni mung lani hte lani tsaw rawt taw nga ai re.
