Myen Hpyen Dap Laknak Kaba Gap Shadam Bun Ai Majaw Mung Shawa Marai 10 Jan Si
Manmaw Myen hpyen dap Ts.K.Hk 21 dap kaw na gap dat ai laknak kaba si, Kan Ni mare makau grup yin hta wa hkrat kapaw ai majaw, Ma kaji marai 3 hte hpawn marai 5 asak bai si hkrum wa sai re.
Manmaw Myen hpyen dap daju Ts,K.Hk (21) Byuha kawng kaw na, Manmaw mare makau grup yin ni de laknak kaba matut manoi gap bun taw nga ai majaw, Manmaw mali hka sinna hkran maga de wa hkrat kapaw ai majaw, mung mare masha marai 5 asak si hkrum wa ai re nga, dai ginra na mung shawa ni KNG shiga dap de tsun dan ai re.
“Ya gaw shana shagu makau grup yin yawng de gap shadam bun taw nga ai, mung shawa ni si hkrum ai mung marai 10 jan du sai, mana si hkrum ai gaw, Ma kaji hte amyu shayi ni hkrai re” nga tsun ai re.
Myen hpyen laknak kaba hte si hkrum ai ni gaw,Mai Ka mare na asak 30 ning re amyu shayi langai Moe Tseing Kyun mare kaw na asak laning mi jan re ma langai, Tsin Kin mare na asak 57 ning re Ma Win Chit ngu ai hte laga mare kahtawng na asak 10 ning npu amyu ma kaji ni re lam chye lu ai.
Ndai shata praw 7 ya shani kaw na, Myitkyina Manmaw lam kaba ntsa na Myen hpyen dap ni hpe KIA htim gasat taw nga ai ten, Manmaw mare kaba hta mung PDF dap ni shang rawng taw sai ngu ai ga baw hte laknak kaba gap shadam bun taw nga ai re nga Manmaw ginra masha ni tsun ai re.
Manmaw mare koi lam kaba, deng 3 sinpraw Tar Si hte, Deng 2 Mai Aung Tar, Han Te lawk ni hta, Myen hpyen dap gap sat da ai moi mang 10 daram nga taw ai lam matut tsun dan ai re.
Dai zawn gap sat da ai ni hpe, Myen hpyen dap kaw na sumla gayet ahkang n jaw ai hte, moi mang sa hta ai ni hpe mung si taw ai hkrang hte raw sha hta shangun taw nga ai nga, garum ningtum hpung ni tsun ai re.
Ya ten Myitkyina Manmaw lam kaba ntsa majan laja taw nga ai rai nna, Myen hpyen dap maga na mung laknak kaba hkrup mara gap shadam bun ai majaw, mung shawa marai 20 hkawt asak si hkrum sai re.
