Majan ten laman hten mat ai Mungmyit mare kaba hpe mung shawa nkau tinang dang di dang dep ai hte mare jasan ai lam, buga gaw sharawt ai lam hpe galaw taw nga ai lam, ginra masha ni kaw na chye lu ai.
Lai wa sai February hpang jahtum bat kaw na, mung shawa n kau hte ရွှေဇာလီ Hpungkyi ဆရာတော် woi awn ai hte, ap nawng daw jau hpung, garum ningtum hpung ni pawng hpam nna, mare jasan jaseng ai lam ni hpe galaw hpang taw sai nga, hpyen yen ni hpe garum ya taw ai salang langai KNG de tsun dan wa ai re.
“Gadai gara wuhpung ni mung n lawm ai, mung shawa ni hkrai tinang dang di a daram galaw shakut taw nga ai, woi awn ai chyawm gaw, Shwe Zarli Saradaw woi awn na galaw taw nga ai” nga tsun ai re.
Mungmyit mare bai gaw sharawt ai hta, madung ရွှေဇာလီ Hpungkyi Saradaw woi awn ai rai nna, mung shawa yawng shang lawm ai hte galaw taw nga ai re lam chye lu ai.
Madung Mungmyit mare kaba hta, Mawdaw lam hte tsi rung wang zawn re ai, mung shawa hte seng ai shara ni hta, jasan jaseng ngut sai rai nna, mare dum nta gat wang yawng hkru hten ai lam ni hpe gaw rai n lu jasan shi ai lam chye lu ai.
Ya ten Mungmyit mare hta mung shawa n kau shang lu sai rai tim, law malawng gaw, majan bai byin wa na hpe myit tsang ai majaw, rai n htang wa shi ai lam chye lu ai.
Mungmyit Mare hpe lai wa sai January 18 ya shani kaw na Wunpawng Mungdan Shanglawt Hpyen dap KIA woi awn ai hte, PDF pawng hpawm dap ni htim gasat wa ai rai nna, nhtoi 10 ya jan gap gasat ai hpang, bai hting nut kau da ai rai nga ai.
