Myitkyina Putao lam pat ai bat mi daram na wa ai hpang, Putao mare kaba hta gun rai manu tsaw rawt wa taw nga ai hta, Udi langai 500 hte mari sha ra taw sai lam chye lu ai.
Sumprabum mayan hta lai wa sai, March 8 ya shani kaw na majan gap gasat hkat wa ai majaw, lam pat mat ai ya n htoi bat mi daram na wa sai majaw, Putao de gun rai shang ai lam n nga mat ai majaw, gun rai manu tsaw rawt wa ai re nga, ginra masha langai KNG de ya na zawn tsun ai re.
“Shawoi Udi langai 300 kaw na 500 rai mat sai, Shakau hpraw nga yang mung 10000 kaw na 12000, laga sau shakau ni yawng kalang ta rawt mat ai, matut na bat mi jan ram nga yang gaw, sau shakau mai dumhprut wa ai,” nga tsun ai re.
Ya ten Putao de lawu ga de na shang ai, U Shan, Nga, tsep kawp n shang mat sai rai nna, nkau seng ni hta sau shakau, Udi ni dumhprut wa taw nga sai re.
Majan laja nna, mawdaw lam kaba matut naw pat taw ai rai yang, Putao ginra hta lu sha hte jak sau ni grai yak wa na masa nga ai lam, ginra masha ni tsun maram taw nga ma ai re.
Sumprabum mare hta lai wa sai March 8 ya shana KIA KPF dap ni sa htim gap gasat wa ai kaw na, lam yawng pat mat ai re lam chye lu ai.
