Tamahkan Mare Hpe Wan Nat Jahten Na Hpungkyi Jawng Hta Rawng Nga Ai Myen Hpyen Hpung Hpe KIA Htim Shagrawt
Hpakant Tamahkan hpungkyi jawng hta dap jung nga ai Myen hpyen hpung ni hpe KIA dap maga March praw 4 ya shana hkying 6 daram sa htim gap gasat ai hta, Myen hpyen dap maga marai 50 hkawt si sum wa ai lam, shawng lam magam gun ni kaw na chye lu ai.
Dai Myen hpyen hpung ni gaw, March praw 3 ya shani, Hpakant maga de na Tamahkan de hpyen n-gun garum na matu sa wa ai ten, lam lapran kaw hkap shingla gasat hkrum ai hta, si hkala sum machyi lam ni law wa ai majaw, Tamahkan mare hpe wan nat jahten nna, hpungkyi jawng hta dap jung nga ai Myen hpyen hpung ni re lam shawng lam magam gun langai KNG shiga dap de tsun dan wa ai re.
“Hpungkyi jawng kaw nga taw ai yawng hpe sa wang gap sat kau da ai, langai hpe mung jahkrung ntawn ai, dai kaw Myen mang tsawm ra si tarai taw ai, dai kaw marai 60 jan gaw nga ai rai nga ai, maram yu yang marai 50 daram gaw si ai, nkau hprawng lawt ai ni mung gaw nga ai,” nga tsun dan ai re.
Dai Myen hpyen hpung ni gaw, Tamahkan mare hpe wan nat jahten taw ai hpyen hpung ni re lam matut chye lu ai.
Hpungkyi jawng hta rawng taw nga ai Myen hpyen hpung ni hpe sa htim gap gasat ai hta, 60 mm myawk si, jak sinat, laga hpyen lang arung arai hte Computer langai hpe zing madu la lu ai lam chye lu ai.
Myen hpyen dap hte SNA dap ni Tamahkan mare wan nat jahten ai majaw, mare htam 3 kaw na htam 2 daram yawng wan hkru hten taw nga sai lam ginra masha ni tsun ai re.
Ya ten Myen hpyen dap gaw Tamahkan dap shara hpe ntat sum hkra nbungli hte wa htim gap gasat taw nga ai majaw, dai ni ten du hkra KIA dap maga rai n lu zing madu la shi ai re.
Ya ten dai ginra na hpyen yen mung shawa ni gaw, Hpakant Seng Tawng ginra ni de hprawng yen taw nga nna, Nawku jawng hte Hpungkyi jawng ni hta mai byin ai hku machyu shingbyi taw nga ai lam chye lu ai.
