Majan byin ai lam n nga tim, Myen hpyen dap maga, KIA Dung 11 ginra de jet fighter nbungli hte bawm sa jahkrat bun wa ai lam chye lu ai.
March praw 4 ya jahpawt jau hkying 3 chyen daram hta Jet Fihter nbungli langai hte Pang Sau Yang ginra KIA Dung 11 shara hta bawm 3 wa jahkrat bun kau da ai lam, KIA Dung 11 hte ni nawn ai Salang langai KNG de ndai zawn tsun dan ai re.
“Dai hpawt manap jau hkying 3 chyen daram hta jet nbungli langai hte bawm masum lang wa jahkrat bun kau da ma ai, langai gaw Gawrahka dap hte gade n tsan ai kaw wa hkrat ai, langai gaw hpyen training dabang kaw wa hkrat ai, langai gaw n kapaw n awng ai, masha chyawm gaw hpa mung n ra ai, gadai mung n hkra ai,” nga tsun ai re.
Ya na zawn Myen hpyen dap nbungli hte wa gap ai majaw, hkra hkala si ai lam hpa mung n nga ai lam chye lu ai.
Ya ten Jinghpaw mung kata Manje hte Hpakant ginra ni hta Myen hpyen dap shara ni hpe KIA dap htim gasat taw nga ai re.
