Mogaung Deng 8 Lam Numbraw Hta Majan Byin Ai Hpang Mung Shawa Hpe Rim Jep Nga
Mogaung kaw na shamu shamawt pru wa ai Myen hpyen hpung hte Pyithutsit dap ni hpe KIA dap Bawm hte hkap shingla gasat dat ai kaw na majan byin wa ai lam chye lu ai.
Mogaung Myen hpyen dap Hk.L.Y (74) hte Man Yawt mare daju Pyithutsit pawng hpawm hpyen n-gun 100 jan hpe KIA Dung 11 ni February 27 ya jahpawt hkying 9 daram ten, Mogaung Deng 8 lam numbraw hta bawm hte hkap shingla gasat ai kaw na majan byin wa ai nga dai ginra na mung shawa langai KNG shiga dap de tsun dan ai re.
“Dai hpawt manap laknak kaba nsen 3 lang na ai, dai hpang loi li gap gasat hkat sam ma ai, dai hpang Myen hpyen dap ni gaw, Mogaung Deng 8 shagyit kaw wa dung nna, lai wa lai sa mung shawa ni hpe sat jep taw ma ai, nkau rim woi da ai lam ni mung nga ai nga na tsun ai,” nga tsun ai re.
Dai hpang shani ka-ang hkying 12 daram ten kaw na, lai wa lai sa mung mare masha ni hpe Mogaung deng 8 shagyit hta laja lana san jep ai lam ni galaw nna, n kau hpe rim woi da ai lam ni mung nga ai nga ginra masha ni matut tsun dan wa ai re.
Kamaing mare hta dung ai Myen hpyen dap ni kaw na Lawa maga de laknak kaba gap bun ai majaw, mung shawa dum nta hkra hten wa ai lam ni nga wa ai re.
Ya ten Myen hpyen dap kaw na mung mare masha ni nga ai shara de laknak kaba jahkring hkring gap shadam bun ai lam ni galaw taw nga ai majaw, mung mare masha ni hkrit tsang taw nga ma ai re.
Ndai laman Myen hpyen dap hte KIA dap lapran shara shagu ngu na hta hpyen masa shaja hkat taw nga nna, Myen hpyen dap shara langai hpang langai hpe KIA dap maga na htim gasat zing madu ai lam ni galaw nga ai re.
