Tamahkan Balik Dap Hpe Htim Gasat Kau Ai Hpang Byuha Dap Hpe Matut Htim Gasat Nga
Hpakant Tamahkan Myen hpyen Balik dap hpe htim gasat zing madu kau ai hpang, Myen Hpyen Byuha dap hpe matut htim gasat taw nga ai lam chye lu ai.
Wunpawng Mungdan Shanglawt Hpyen dap KIA Dapba 9 Dung 6, hte KPDF dap ni kaw na Tamahkan Myen hpyen dap hpe February 26 ya shana maga hkying 4 daram aten kaw na htim gasat hpang wa ai hta Balik dap hpe hkying hkum mi jan laman htim shagrawt kau lu sai rai nga ai.
Balik dap hpe htim shagrawt kau lu ai hpang, Myen hpyen byuha dap hpe matut htim gasat taw nga ai hta, Myen hpyen dap maga de nbungli hte laja lana wa gap sharu bun taw ai majaw, dai dap shara kawng de lung na matu yak taw nga ai lam, shawng lam magam gun langai ndai zawn tsun dan ai hpe, shim lam a majaw, KNG na hti shalai da ai re.
“Myen hpyen dap maga nbungli hte nau wa gap ai majaw, dai kawng de lu lung na matu yak taw nga ai, ya mung matut gap taw nga ding yang re, Kasen bum maga de na hpyen garum ni mung bai du wa ai majaw, grau yak mat taw nga ai, laknak kaba nbungli hte wa gap bun taw ding yang re,”
Kasen Bum hta dung ai Myen hpyen n-gun dai shara de sa du garum taw ai majaw, Myen hpyen dap shara hpe htim gasat zing madu lu na yak hkak taw nga ai lam matut tsun dan ai re.
Myen hpyen dap shara hpe htim gasat ai hta, Myen hpyendap nbungli hte laja lana wa gap bun wa ai majaw, lahkawng maga si hkala ai lam nga taw ai re.
Tamahkan Balik dap hpe htim gasat ai hta, si hkala law wa ai zawn, Myen hpyenla marai 11 hpe jahkrung lu rim da ai lam chye lu ai.
Myen hpyen dap maga de na nbungli hte wa htim gap gasat ai majaw, mung shawa dum nta law law hten hkrum wa nna, nkau hkala hkrum ai lam ni mung nga ai lam ginra masha langai matut tsun ai hpe, shim lam a majaw, Nhkum Ah Doi hti shalai da ai re.
“Mana maga de kaw na nbungli hte wa gap bun taw ai, hkying 5 daram hta re, dai hpawt manap mung hkying 9 daram kaw na bai sa gap bun taw ai, shani ting wa gayin gap, wa gayin gap re, kalang lung wa yang Jet Fighter 2 hte lung wa na wa gap ai, jak sinat hte mung gap sharu bun ai, Myen hpyen byuha dap na mung gap bun ai, mare dum nta ni mung tsawm ra hten mat sai.”
Myen hpyen dap maga nbungli hte wa sharut bun ai sha n ga, Hpakant byuha dap kaba kaw na laknak kaba ni hte gap bun ai majaw, dai ginra na asak 60 ning daram re salang langai asak sii hkrum wa ai re.
Ya ten dai ginra na mung mare masha yawng tinang man ang ai shara ni de hprawng yen nna, mare kata gadai mung n nga sai lam chye lu ai.
Hpakant ginra Gwi Hka Myen hpyen dap shara hpe January 20 ya shani htim gasat zing madu la lu ai rai nna, Namting dap shara hpe February praw 3 hta zing madu ngut ai hpang, ya Namting dap shara hpe bai lu zing madu wa ai rai nga ai.
