Munggu Mare Hta Kokang MNDAA Dap Ni Kaw Na N’ta Langai Hpang Langai Hkan Sawk Jep
Kokang MNDAA dap ni kaw na, Munggu mare kata mung shawa dum n’ta langai hpang langai hkan sawk jep taw nga ai lam ginra masha ni kaw na chye lu ai.
Laknak hkan sawk jep ai ngu gabaw hte dai ni February 15 ya shani n’ta shagu hkan sawk jep taw nga ai lam Munggu ginra masha langai ndai zawn tsun dan wa ai re.
“Prat ting Myen hpyen dap ni pyi, ndai zawn kalang mung n hkan gasawk hkawm ga ma ai, hkrum mung n hkrum yu ga ai, ya Kokang miwa ndai ni up ai shaloi she kaning mung rai ma ai,” nga tsun ai re.
Lai wa sai February 11 ya Miwa Gaw Nyen shang ai shana hta Munggu lawk 5 salang wa a nta hta bawm sa kabai bang ai majaw, ya na zawn laknak tam ga baw hte hkan gasawk hkawm wa ai re lam ginra masha ni tsun ai re.
Dai shana hta Kokang dap ni shan hte shada lu lai sha lai nang nna, shada n hkrum n ra byin ai kaw na bawm kapaw wa ai re lam matut tsun dan wa ai re.
Ya na zawn Kokang dap ni kaw na mung mare masha ni a dum n’ta de wang lu wang lang shan hte ra ai hku hkan sawk jep hkawm wa ai gaw, mung shawa wa ngan ni yawng sinat hpai ra ra rai ra sai ngu jahta dan ai hpe myit tsang wa ai majaw, ya na zawn hkan sawk jep wa ai masa re nga, ginra masha langai ndai zawn tsun maram da ai re.
“Munggu ginra kaw Shanglawt ni hte pawng nga, rai jang gaw anhte mung shawa ni hpe laknak n lang shangun ai rai nga ai, dai anhte shanglawt ni hpe loi mi di mayu na hkan sawk ai kun ngu she shadu ai, anhte mung shawa n kau myit ai hpe nau shaga shapraw dan na she nre dawng, anhte mung shawa ni yawng nta shagu wa ngan ni ra ra sinat hpai ra sai nga she n sa jahta dan hkrup i, dai hku mi rai wa kun nga hpe myit tsan nna hkan sawk ai masa re ngu mu ai law” nga tsun maram wa ai re.
Ya ten Munggu mare hta KIO Ninghtawn rung, ginwang daw rung hte, hpyen dap shara ni jahkrat da nna, Kokang MNDAA dap ni hte rau jawm up hkang taw nga ai re.
Munggu, Hpawng Seng ginra hpe Myen hpyen dap a lata kaw na lai wa sai 2023 ning November shata hta Kokang MNDAA dap ni zep zi htim gasat zing madu la lu wa ai rai nga ai.
