Dukaba Sumlut Gun Maw hte KIA PDF Nawku Hpung Ningbaw Ni Hpe Jahkrit Sharim ai Shwe Min Nre Lam Sanglang Wa
Shwe Min Pyithutsit mying hte Myitkyina muklum lawk shagu na lam ntsa hte gat ni hta, Dukaba Sumlut Gun Maw hte rau KIA PDF Nawku hpung ningbaw ni hpe jahkrit sharim ai laika pa hte seng na Shwe Min rai n rai chye mayu ai lam, Dukaba Sumlut Gun Maw shi Facebook ntsa hta ka mara ai hpang dai shana jang Salang Shwe Min maga na mung dai zawn sari n nga ai amu hpe shi galaw ai n re lam bai sang lang wa ai re.
Dai Laika hta “Dukaba Gun Maw a hpang hkan KIA PDF hte Nawku hpung sara ni ndai 10 ya laman Myitkyina muklum kata na lawan pru mat na lam, lama pru mat wa ai lam n nga ai rai yang jasan mat wa na,” nga, tsun da ai re.
Dai laika pa hpe Myitkyina lam kaba n tsa hkan, gat ayai shabra da ai hpe February praw 4 ya shani kaw na mu lu wa ai re.
Laika pa shabra ai hte seng nna Dukaba Gun Maw maga mung, “ndai laika shabra ai U Shwe Min rai nrai chye mayu ai lam, lama na, Salang Shwe Min n re ai rai yang February praw 8 ya shani hpang jahtum n re lam hpe ndau ya na matu hte, February praw 8 ya shana du hkra ndau sang lang ai lam n galaw yang, Salang Shwe Min re ngu masat la na,” nga tsun wa ai re.
Dukaba Gun Maw maga dai zawn ndau dat ai hpang dai shana jang, Salang Shwe Min shi Facebook ntsa hta shi nre ai lam, tsun sang lang wa ai re.
Shi tsun sang lang da ai hta, ”Ndai zawn sari n rawng ai laika ndau shabra ai lam hpe galoi mung n galaw ai hte, dai zawn galaw na lam mung n nga ai rai nna, Mung masa Hpyen masa ningbaw shada dai zawn sari nrawng jahpoi jahpyak hkat ai lam hpe, galoi rai tim galaw na nre nga,” ka mara wa ai hpe mu lu ai.
Ya ten Salang Shwe Min woi awn ai Pyithutsit hpung ni kaw na, Lisu myu sha ni hpe ma ja hpyen lahkawn la nna, Myen hpyen dap hte pawng hpawm let, KIA PDF dap ni hpe ninghkap shingla taw nga ai re.
