Bumring Bum Balawng Dingsa Myen Hpyen Dap Shara Hpe KIA Htim Gasat Zing Madu
Manje Manwin lapran na, Bum Ring Bum Balawng Dingsa Myen hpyen dap hpe KIA dap maga htim gasat zing madu kau lu sai lam, Dukaba Nhpang Naw Bu tsun ai re.
Balawng Dingsa Myen hpyen dap hpe February praw 1 ya jahpawt kaw na, htim gasat hpang wa ai gaw, February praw 2 ya jahpawt hkying 7:45 aten shang zing madu lu sai nga tsun ai re.
“Shiga hkum hkum tsup tsup gaw n chye lu shi ai, dai hpawt hkying 7:45 daram ten lu zing ai nga daram sha naw chye lu ai,” nga tsun ai re.
Dai ginra na Myen hpyen dap shara hpe htim gasat zing madu taw nga ai hta, laknak kaba hte Drone hpe madung jai lang nna gasat taw nga ai lam shawng lam magam gun ni kaw na chye lu ai.
Dai dap shara hpe htim gasat ai hta KIA Dung 1, Dung 12, Dung 27 hte KPDF pawng hpawm nna, htim gasat zing madu wa ai re lam chye lu ai.
Ya zing madu la lu ai Balawng Dingsa Myen hpyen dap gaw Kaihtik mare a dingdung maga deng 5 daram tsan ai shara rai nna, Kaihtik dap hpe zing madu ngut ai hte dai dap shara hpe bai zing madu wa ai rai nga ai.
Kaihtik ginra gaw lai wa sai 2011 ning November shata majan byin wa ai majaw, dai ginra na mung shawa ni yawng hprawng yen kau da ai majaw, dai ginra na mare buga dum nta yawng hten mat sai rai nna, yawng nam maling hkrai byin ma sai lam chye lu ai.
Dai ginra na mung shawa ni gaw, Manmaw, Manje, Manwin Gyi, Nba pa, Lana zup ja ginra ni de hprawng yen taw nga ai shaning 10 ning jan sai re.
Ya na zawn Kaihtik ginra yawng hpe KIA dap maga bai htim gasat zing madu wa lu ai a n-tsa, kabu myit dik ai lam hpe ginra masha langai ndai zawn tsun dan ai re.
“Grai myit pyaw ai anhte buga anhte ginra hpe anhte myusha ni bai lu madu wa ai gaw grai kabu ai, grai myit dik ai, ngai pyi ya jang sengke hte tim wa gawan du yu na ngu ai, rai tim bawm jasan ra ai lam ni naw galaw ra ai majaw, gadai hpe mung rai n shang shangun shi ma ai,” nga tsun ai re.
KIA dap maga lai wa sai January 19 ya shani Manwin Gawngngu Yang Myen hpyen dap hpe htim gasat zing madu ai hpang, January 21 ya shani Manwin Myen hpyen dap shara yawng hpe htim gasat zing madu kau sai re.
Dai hpang Kaihtik Myen hpyen dap kaba hpe January 29 ya shani bai htim gasat padang dip la lu ai hpang, February praw 1 ya jahpawt kaw na Balawng Dingsa hpe bai htim gasat ai gaw, dai ni February praw 2 ya jahpawt padang dip gap gasat zing kau lu sai re.
Ya htim gasat zing madu la lu ai Balawng Dingsa Myen hpyen dap gaw, lai wa sai ten KIA Dung 27 Dapdung Daju shara re lam chye lu ai.
