Namma Myen Hpyen Myawk Dap Kaw Na Laknak Kaba Gapbun Ai Majaw Mung Shawa Marai 4 Si nna Mahkrai 8 Hkala Hkrum
Masat (385) Namma Myen hpyen myawk dap kaw na, Majan byin ai lam n nga tim, laknak kaba gap shadam bun ai majaw, mung shawa marai 4 asak si sum nna, marai 8 hkala hkrum wa ai re.
January 27 ya jahpawt kaw na, Myen hpyen dap laknak kaba shani ting gap bun taw nga ai majaw, Namma Letpantan mare na mung shawa marai 3 hte Nansalaw mare na mung shawa langai si hkrum wa nna, laga mung shawa marai 8 mung hkala hkrum wa ai nga, dai ginra na mung shawa langai KNG shiga dap de tsun ai re.
“27 ya jahpawt gaw Letpantan lawk na nta langai kaw wa hkrat ai, shat sha taw ai ten kaw wa ang ai majaw, shan Nu ni masum si hkrum ai, dai hpang 29 ya jahpawt Monyin maga na lung wa ai Nansalaw mare na mung shawa lahkawng Nyaungpin Thar lawk kaw wa kapaw hkra ai kaw langai si hkrum wa ai,” nga tsun dan ai re.
Laknak kaba si hte mung shawa nkau mung hkala hkrum wa ai rai nna, dai hkala hkrum ai mung shawa ni ya ten Monyin mung shawa tsi rung hta tsi sa tsi hkam la taw nga ai lam chye lu ai.
PDF dap ni kaw na mung, Myitkyina Mandalay lam kaba ntsa, Monyin pru shang lam ni hta hkawn kang hta ai lam hte san jep ai lam ni nga ai majaw, ya na zawn gap shadam bun ai masa re lam ginra masha ni tsun ai re.
Masat (385) Namma Myen hpyen myawk dap kaw na laknak kaba gap shadam bun nga ai majaw, ya ten dai ginra na mung shawa na gaduk n hkun ni hta sha makoi yen taw nga ai re.
Myen hpyen dap ni dai zawn laknak kaba gap shadam bun taw nga ai majaw, mung shawa ni myit tsang taw nga nna, hkawm sa hkawm wa lam ni hta mung yak hkak taw nga ai re.
