Mabeing muklum hpe KIA htim gasat zing madu kau ai hpang, dai kaw na hprawng pru wa ai Myen hpyen la marai 40 daram hte KIA dap ni majan kalang bai gap gasat hkat wa ai nga dai ginra na, mare masha ni kaw na chye lu ai.
January 24 ya shana hkying 9 daram hta Mabeing hte Man Je lapran na Kaung Lwin mare shingdu deng 5 daram tsan ai nam maling shara mi hta hprawng gale pru wa ai hpe, KIA Dung 12 ni hkap shingla gasat ai kaw na majan byin wa ai nga, Kaung Lwin mare masha langai KNG shiga dap de ndai zawn tsun dan wa ai re.
“Mabeing kaw na hprawng pru wa ai Myen hpyen hpung ni nam maling shara mi kaw gale pru wa ai, KIA Dung 12 ni hkap gap dat ai majaw, bai hprawng nhtang mat ai, hpang jahpawt mi mu wa ai hte KIA ni shan hte hpe wang shing grup na bai tam taw nga ai,” nga tsun dan ai re.
Dai Myen hpyen dap ni hprawng gale pru wa ai ten, dai ginra hta bum yi hkyen taw nga ai mung shawa marai 3 hpe Myen hpyen dap ni rim woi mat nna, hpyen ning gang shatai woi hkawm ai hta, langai gaw hprawng lawt wa ai lam chye lu ai.
Ya ten dai Myen hpyen hpung ni hpe KIA dap maga wang shinggrup da nna, dai nam maling hta sha chyat rawng taw nga ai re lam chye lu ai.
Mabeing mare kaba hpe KIA woi awn ai hte PDF, ABSDF Jawng ma dap pawng hpawm hpung ni kaw na, January 21 ya shani zip zi htim gasat zing kau ai hta Myen hpyen bawng masha n kau hpe mung lu rim wa ai re lam chye lu ai.
Ya ten dai ginra makau grup yin ni hta mung majan matut byin wa na hpe myit tsang ai mung mare masha nkau ting nang shim lum dum ai shar ani de hprawng yen hkawm taw nga ai re.
Myen hpyen dap gaw ya ten Jinghpaw mung hte Sammung jarit, Mabeing, Mungmyit mare kaba ni hta Phone Internet line yawng pat da ya nna, dai ginra na masa lam kata lam hpe a tsawm tup hkrak sawk sagawn lu na yak hkak taw nga ai re.
