Lawa Magawng Tawng mare hta sat hkrum ai mung shawa marai 9 a amu mang hkang laning mi ladu hkrum sai rai tim, dai ni ten du hkra tara rap ra ai lam rai n lu shi ai hte, ndai mabyin san jep ai lam hpe gan jahkring da ai re.
Ndai mung shawa marai 9 sat hkrum ai amu mang hkang hte seng nna, Laiza KIO Ginjaw tara rung hta amu hpaw nna, July shata kaw na san jep taw nga ai gaw, Myitkyina Manmaw lam ntsa majan bai byin wa ai kaw na lam pat mat ai majaw, dai ni du hkra dai amu mang hkang hpe jahkring da ai rai nga ai.
Ya na zawn mung shawa marai 9 ntara sat hkrum ai laning mi ladu hkrum sai rai tim, KIO maga de na, tengman ai lam lu hkra mahtai shapraw ya ai lam rai n nga shi ai zawn, nta masha ni hpe mung hpa n sa tsun ai nga, mung shawa tengman lam tam komiti na lit nga ai salang langai KNG de ndai zawn tsun dan wa ai re.
“Ndai ten du hkra KIO/KIA maga de na lit la hparan ya ai lam hpa rai n nga shi ai, madung sat hkrum ai nta masha ni hpe mung KIA maga lama ma sa tsun n-gun jaw ai lam ni mung n nga ai, anhte gaw ndai amu mang hkang hpa lawan ngut mayu sai,” nga tsun ai re.
Mung shawa marai 9 hpe KIA Dung 20 na lit nga ai ni sat makoi da ai hpe, Mung shawa maga de na KIO ntsa tsang salang ni hpe sa shaw madun ai lam hte, tara shawn maga de na ni hpe san jep ai madang sha naw galaw lu ai re hpe chye lu ai.
Ya na zawn laning mi ladu hkrum wa ai ten du hkra rai tim, tenman lam n lu tam ya ai a n tsa, sat hkrum ai hta lawm ai Slg Laude Yaw Han a madu jan mung ndai zawn tsun wa ai re.
“Ya na zawn hpa mara mung n nga ai ni hpe sat kau na ya laning mi du ai ten du hkra hpa mung n sa tsun hpa mung n galaw ya grai mau ai, hpa majaw nga yang ya du hkra hpa mahtai mung n shapraw ya, ngam ai dum nta masha ni hpe hpa ahkyak n shatai ai ngu sha mu ai, ndai lam hte seng na anhte dum n’ta masha ni gaw tengman rap ra ai lam hpe ra ai, lawan mung ngut mayu sai,” nga tsun ai re.
Ndai amu mang hkang lam hte seng na, KIO/KIA kaw na tengman rap ra ai lam hpe lu la na matu, mung shawa yawng hte dum nta masha ni myit mada nga ma ai re.
Mung shawa marai 9 sat hkrum ai laning mi ladu hkrum kyuhpyi n-gun la ai lam hpe Namti Lambraw Yang buga hpung hta January 25 ya shani galaw wa ai hpe chye lu ai.
Dai mung shawa marai 9 sat hkrum ai gaw, lai wa sai 2023 ning January 23 ya shani Lawa Magawng tawng mare sun de Nga hkwi sha sa ai ten, shana hkying 8 daram hta KIA PDF dap ni kaw na rim woi mat ai hpang, atsawm san jep ai lam n nga ai sha sat kau ai rai nga ai.
Dai sat hkrum ai marai 9 gaw, asak 47 ning re Slg Laude Yaw Han, asak 49 ning re Slg Kyaw Soe, asak 56 ning re Lazum Tu Lum, asak 35 ning re Lazum La Htoi, asak 28 ning re Hpauma Hkawn Bu, asak 28 ning re Jan Ndau Htu Nan, asak 27 ning re Tun Yung, asak 50 ning re Ko Myint Htwe hte Ko Pho Lay ngu ni re lam chye lu ai.