Hti Chyaik mare kaba hta Myen hpyen dap hte Wunpawng Mungdan Shanglawt Hpyen dap KIA woi awn ai PDF pawng hpawm dap ni majan matut laja taw nga ai lam chye lu ai.
Lai wa sai 2023 November praw 7 ya shani kaw na htim gasat taw nga ai Hti Chyaik muklum hta dai ni du hkra lahkawng maga majan matut gap gasat hkat taw nga ai hta, Myen hpyen dap maga de na nbungli laknak kaba ni hte matut ndi ding yang wa gap bun taw nga ai nga, dai ginra na PDF magam gun langai KNG shiga dap de tsun dan ai re.
“Ndai laman shani shagu laknak kaba ni hte nbungli ni hte hkrai sa gap sharu bun taw nga ai, kata lam majan masa lam chyawm a tsawm tup hkrak n chye lu ai, tsawm ra gaw laja taw nga ai,” nga tsun dan ai re.
Sammung maga de Myen hpyen dap hte dingdung daw dap hpawm hpung ni lapran gap hkat jahkring da ai hpang, Sagaing ginra maga de n gun dat nna, bai gasat wa ai masa re lam, mung masa yu maram ai ni kaw na tsun da ai re.
Dai majan hta Myen hpyen dap maga de na, n bungli hpe madung jai lang gasat taw nna, January 10 kaw na 14 ya laman, Mandalay TadaU, Magwe hte Myitkyina maga de na yu wa ai Jet Fihter nbungli, MI 35 Holicopter ni hte sa htim gap gasat taw nga ai lam, Htichyaik Revoluton wuhpung ni kaw na ndau da ai re.
Dai zawn majan laja taw nga ai Hti Chyaik muklum kata mung shawa gadai n nga mat sai rai nna, Hti Chyaik mare kaba mung htam 3 na htam 2 gaw yawng hten mat nna, n kau n hten ai nta hkan gaw lagut ni yawng adup hpaw sha kau ma sai lam chye lu ai.
Ya na zawn mung shawa nta hten ma ai lam ni hpe rawt malan dap maga de na sumla ni hkrak n dau da ai hpe mu lu ai re.
Hti chyaik muklum hpe htim gasat taw nga ai ya shata lahkawng jan wa ai hta, lahkawng maga dap de na si hkala sum machyi lam ni nga taw ai re.
Ya ten dai shara hta majan matut laja taw nga ai rai nna, Myen hpyen dap maga de na nbungli laknak kaba ni hte ding yang gap bun taw nga ai re.