Shwegu ginwang kata, ndai January shata mi laman Myen hpyen la marai 10 jan Wunpawng Mungdan Shanglawt Hpyen dap KIA the Local PDF dap ni kaw laknak jahkrat nna, shang wa ai lam nga ai hpe lit nga ai ni kaw na chye lu ai.
Ndai shata mi laman hta marai 10 jan du shang wa ai hta, masha wuhpung nawng shang wa ai n re sha, ding hkrai hku na shang wa ai ni hkrai re nga, KNG de ndai zawn tsun dan wa ai re.
“Ndai shata shang wa ai marai 10 rai sai, wuhpung nawng shang wa ai hku gaw n rai na, langai hpang langai shang wa ai, laknak ni grai wa gaw n lawm shang wa ai, anhte Local PDF kaw gaw marai 6, KIA Dung (5) de gaw marai 4 yawng rai yang marai 10 shang wa ai ga rai nga ai,” nga tsun dan wa ai re.
Ya shang wa ai Myen hpyen la ni gaw, Jinghpaw mung hte Sammung jarit, Nga Oo dap, Moe Meik dap hte Shwegu Hk.L.Y 56 Hk.M.Y 602 dap ni rai nna, Shwegu sinpraw maga hta nga ai Local PDF hte KIA Dung 5 ni hpang de shang wa ai mung rai nga ai.
Dai ginra hta lai wa sai ten mung KIA dap maga de laknak jahkrat na shang wa ai ni ding yang nga wa yu ai rai nna, ndai laman majan grai wa laja ai lam n nga tim, Myen hpyen dap ni shang wa taw ai rai nga ai.
Myen hpyen dap ni asum jaw shang wa ai lam hte seng nna, ginra masha ni myit tsang ai lam ni mung nga taw ai re.
