Myen hpyen dap Jet Fighter nbungli langai hpe KIA gap jahkrat kau lu ai lam, Dukaba Naw Bu tsun ai re.
Dai ni shani ka-ang hkying 11 chyen daram hta, Namhpakka mare hta bawm wa jahkrat bun ai Myen hpyen Jet Fighter nbungli langai hpe KIA dap maga gap jahkrat kau lu ai re lam, KIA shiga magam dap lithkam Dukaba Nhpang Naw Bu KNG shiga dap de tsun ai re.
“Nbungli gap jahkrat kau lu ai lam gaw teng ai, rai tim, kata lam mabyin lawng lam hpe a tsawm tup hkrak grai n chye lu shi ai” nga tsun ai re.
Namhpakka Myen hpyen dap Hk.L.Y 123 hpe KIA dap maga January 14 ya shana hkying 11 daram hta lu shang zing sai rai nna, ya ten dai makau grup yin hta, laknak machyu pala ni hpe jasan taw nga ai ten, Myen hpyen dap maga, nbungli hte bai wa gap bun ai rai nga ai.
Ya ten Namhpakka mare hpe KIA dap maga htim gasat zing madu kau sai rai tim, Myen hpyen dap maga nbungli hte naw wa gap bun taw nga ai zawn, kata lam majan masa lam ni hpe a tsawm tup hkrak grai n chye lu shi ai rai nga ai.
Namhpakka Kutkai mayan yawg Myen hpyen dap Phone Internet line n lu nna, mung shawa ni hte matut mahkai yak hkak taw ai mung rai nga ai.
Lai wa sai January praw 3 ya shani hta mung, Nahpaw de malu masha wa htaw sa ai, Holicopter nbungli langai hpe, mung KIA dap maga gap jahkrat kau lu wa sai re.
