Waimaw ginwang hte Awng Mye Thit mare ni hta Slg Shwe Min woi awn ai Pyithutsit hpung ni kaw na, laja lana hpyen lahkawn nga ai zawn, n ta masha ni hpe du hkra rim lahkawn nna, asak ram ai ni hte bai sa galai shaw la shangun taw nga ai lam, ginra masha ni tsun ai re.
Awng Mye Thit mare lam kaba n tsa nlung hka mahkrai hta dap jung tawn ai Pyithutsit dap ni kaw na, lai sa lai wa mung mare masha ni hpe laja lana san jep ai lam hte, Lisu myusha rai yang, hpyen hkap rim lahkawn taw nga ai nga, dai ginra na mung shawa langai KNG shiga dap de tsun dan wa ai re.
“ya hte bat kru ya shani law dik hkra rim da ma ai, dai shara kaw du ai hte hpa amyu rai san ai, Lisu Lovho nga yang yawng hkring shangun ai, mawdaw kaw lawm wa ai ni yawng yu sha re, mu mamu yawng hpe hkap shaga jahkring da ai, dai majaw ya hkawm sa hkawm pyi yak wa taw sai, dai ni mung naw rim taw nga ai,” nga tsun dan ai re.
Aung Myen Thit Nlung Hka Pyithutsit gate hta January 13 bat kru ya shani hta, laja lana san jep rim ahkyak la taw nna, Lisu myusha marai 30 daram rim hkrum wa ai rai nga ai.
Waimaw ginwang kata, Lisu amyu sha ni grau law nga ai mare kahtawng lawk ni rai nga ai, Aung Myen Thit, Wuyan, Jam ga mare ni hta n ta langai hpang langai pru shang galaw nna, nta langai Pyithutsit hpyenla langai n galaw n mai hkan rim woi nna, Pyithutsit galaw na matu ning dang ai nta ni hpe asak kaba ai rai tim rim woi mat ai lam nga ai nga, ginra masha langai ndai zawn matut tsun dan wa ai re.
“Ya rim ai gaw dai Aungmye Thit kaw sha n re, nta hkan du hkra hkan rim lahkawn taw ai, ndai laman grau sawng wa taw nga ai, shan hte rim ai hta mung asak pang n lata yawng hpe rim ai, ramma ni n nga yang dingla ni hpe rai tim rim woi mat ai, ngut na bai sa galai shaw la shangun ai zawn re ni galaw taw ai,” nga matut tsun dan wa ai re.
Pyithutsit hpyen la hkan rim woi lahkawn nga ai hta, Pyithutsit galaw na matu ning dang na hprawng makoi hkawm mat ai ni hpe, nta kaw nga ai kanu kawa ding la ni hpe ri tim rim woi mat nna, kasha ni hte bai sa galai shaw la shangun ai lam ni galaw taw ai re.
Ya na zawn nta masha n ngam yawng hpe hkan rim woi lahkawn taw nga ai gaw, lai wa sai December shata Dalaw mare makau hta byin ai majan hta, Pyithutsit ni tsawm ra rim hkrum mat ai hte, hprawng mat ai ni law ai majaw, ya na zawn laja lana kalang bai lahkawn wa ai mai byin ai nga ginra masha ni tsun maram da ai re.
Shwe Min Pyithutsit hpung ni hku na ya na zawn hpyen laja lana lahkawn nga ai majaw, ginra masha ni mai byin ai shara ni de hprawng yen taw nga ai majaw, yak hkak hkrum ai ni mung nga ai hpe chye lu ai re.
