Hpakant ginra hta Myen hpyen dap hte balik ni pawng hpawm nna dap jung ai shagyit ni yawng ngu na daram hpe ndai laman yawng gun kau sai lam, Hpakant ginra masha ni kaw na chye lu ai.
Hpakant pru shang lam kaba, Lunghkang, Hpakant, Seng Tawng mare hkan na shagyit ni yawng hpe ndai laman gun kau ai rai nna, Myen hpyen dap ni shinggan de pru hkawm ai lam ni mung tsep kawp n nga mat ai daram byin taw nga ai lam, dai ginra na mung shawa langai KNG de dai zawn tsun dan ai re.
“Shawoi ding yang san jep ai shara ni hta ya gadai n san jep mat masai, shan hte dai hku zim rai na nga mat ai grai na sai, shinggan mung npru mat masai, shawoi hkan nga yang balik dap shawng hka, Uru hka mahkrai hkan ding yang dung nna jep ai, ya ndai laman gaw hpa n mu mat sai,” nga tsun dan ai re.
Lai wa sai ten Myen hpyen dap ni gaw, Hpakant balik dap shawng, Hpakant Uru Hka mahkrai, Lunghkang Num shang, Pan Tin mahkrai, hte Seng Tawng mare numshang shagyit ni hta dap jung let laja lana san jep ai lam ni galaw wa nna mung shawa ni jahkring hkring hkap rim hkrum ai lam ni nga wa ai re.
Myen hpyen dap ni kaw na ya na zawn shagyit ni yawng hpe dawm mat wa ai lam hte seng nna dai ginra na mung shawa langai ndai zawn matut tsun maram da ai re.
“Ndai hpe maram yu yang, Myen hpyen dap ram ram sum machyi taw sai ga re, mung shawa yawng rawt malan ai lam awng dang wa ai lam ngu mu mada lu ai, maga mi de shan hte dap shara law law sum machyi wa ai majaw, hpyen n-gun yawng gahkyin ma ai ngu mu mada ai, shawoi na zawn mung shawa ni hpe shatsang ai lam n nga ai daram rai taw ai,” nga tsun maram tawn ai re.
Ya ten Hpakant lam mayan hta naw nga ai Myen hpyen dap shagyit ni gaw, Nam Ya, Lunghkang Hpara kawng, ni sha ngam sai re lam chye lu ai.
Hpakant numshang, Sha It Yang ( Lay Pyin) pawng hpawm shagyit kaba hpe lai wa sai November praw 6 ya shani tsep kawp dawm kau wa sai re.
