Dingdung daw rawt malan pawng hpawm dap ni zing madu da ai Muse 105 Mile de Myen hpyen dap laknak kaba gap bun ai majaw, mung shawa marai 3 si nna, marai 5 hkala sawng wa ai lam chye lu ai.
December 26 ya shana maga hkying 5 daram hta, Muse Myen hpyen dap kawng kaw na, Deng 105 mare maga de, majan byin ai lam n nga ai rai tim, laknak kaba 8 lang gap bun wa ai majaw, si hkala hkrum wa ai re nga, dai ginra na mung shawa langai KNG de ndai zawn tsun ai re.
“Grai wa gap hkat ai lam gaw n nga ai, laknak kaba hte gap ai lam chyawm gaw nga ai, mana de Muse kaw na gap dat ai laknak kana 8 lang ram wa hkrat ai, mung shawa nta tsawm ra hten mat ai, dai kaw si hkala ai ni mung nga ai,” nga tsun ai re.
Laknak kaba si hte hkala hkrum ai mung shawa ni hpe, Munggu tsi rung de htaw sa nna, tsi tsi hkam la shangun taw nga ai lam matut tsun dan ai re.
Ya ten Muse muklum hpe ntat sum hkra Myen hpyen dap shakut taw nga ai rai nna, dai shara hta, dapnu 99 hte Hpawng Seng, Munggu, Pang Sai, Deng 105 hkan na hprawng yu wa ai Myen hpyen hpung ni yawng hte Holicopter hte wa htaw sa da ai hpyen n gun hkying lam Muse muklum kata hta shara jahkrat da ai lam ginra masha ni tsun maram da ai re.
