Waimaw, Hkakum mare Myen hpyen dap makau hta nga rem taw ai asak 15 ning daram re ma langai, bawm kabye kapaw la hkrup nna hkala sawng wa ai lam, ginra masha ni kaw nna chye lu ai.
December 26 ya shana maga hkying 4 daram hta, Waimaw Myen hpyen dap Hk.L.Y (58) dap shara makau hta, nga rem taw nga ai ten sa kabye kapaw la hkrup ai re lam, dai ginra na mung mare masha langai KNG hpe ndai zawn tsun dan ai re.
“Waimaw 58 dap makau kaw nga sa rem ai, nga ni hkawm ai shara kaw bawm kapaw wa na, nga masum dai kaw nan si mat ai, nga rem ai ma gaw bawm hkyep kamang hkra na hkala sawng ai,” nga tsun dan wa ai re.
Bawm kapaw hkrum ai ma hpe, garum ningtum hpung ni, Myitkyina mung shawa tsi rung de htaw sa da ai rai nna, kanu yan kawa gaw, Pang Wa de bungli galaw sa mat ai majaw ya ten du hkra dai ma hte, ga rai n hkrum shi ai re lam chye lu ai.
Ya ten Waimaw Myen hpyen dap makau grup yin ma hkra hta bawm hkam da ai rai nna, dai bawm hkam da ai shara makau grup yin hta, shawoi dudy sin ai masha nga ai rai tim, mani gadai mung gan n nga ai ten kaw kapaw hkrum wa ai re lam matut chye lu ai.
Myen hpyen dap daru magam zing kau ai hpang, Waimaw Wuyan mare makau grup yin hta Myen hpyen dap hte Pyithutsit dap ni bawm hkam ai lam a majaw, mung shawa ni bawm kabye kapaw hkrum ai lam ni nga taw ai re.
