Hpakant, Myen hpyen dap rim sharen da ai, Mung shawa marai 2 hpe December 26 ya shana maga de Myen hpyen dap Holicopter nbungli hte wa woi mat ai nga, Hpakant ginra masha ni tsun ai re.
Ko Thein hte U Myint Lwin yan hpe Monyin htawng de htawt sit na matu, Hpakant Byuha kawng kaw na Holicopter nbungli hte wa woi mat ai re nga, Hpakant ginra masha ni tsun ai re.
Shan yen lahkawng gaw, laknak hpai ai tara kanu hte rim sharen da hkrum nna, Myen hpyen dap rim zingri san jep hkrum taw ai mung rai nga ai
“Ko Thein hte U Myint Lwi yan hpe rai nga ai, madung gaw amu mang hkang kaba ai re nga yang, Monyin htawng de htawt la ai hku holicopter nbungli hte wa woi mat ai ga rai nga ai,” ginra masha langai KNG de tsun dan wa ai re.
Ko Thein hte U Myint Lwin yan hpe lai wa sai June shata praw 8 ya shani San Chyoi mare makau hta n-gun madun ai kaw na bai wa ai ten rim hkrum ai rai nna, shan yen hta lak nak mu jep shapraw ai majaw, gasu gabrawng ninghkap shazim ai tara kanu hte tara jewat da hkrum ai re.
Myen hpyen dap daru magam zing ai hpang, shi hpe. lam amyu myu hku nna ninghkap ai mung shawa marai 200 jan hpe Hpakant htawng hta rim sharen da ai kaw na, marai 70 jan gaw masat da ai nhtoi ladaw hpring na lawt pru wa sai re lam chye lu ai.
Nkau law malawng hpe gaw ya ten du hkra dat ya ai lam rai n nga shi ai sha n ga, n kau matut mahkai n lu ai ni mung lawm ai lam ginra masha ni matut tsun ai re.
Hpakant ginra hta gumshem Myen hpyen dap hpe mung shawa yawng lam amyu myu hku dai ni ten du hkra matut ninghkap taw nga ai re.
