Sinli mare kaba hta Myen hpyen dap nbungli hte laja lana bawm wa jahkrat bun taw nga ai lam chye lu ai.
December 25 ya shana maga hta Sinli pa, Pan Law Toolgate, Wing len, Mai Yan, mare ni hta wa jahkrat bun kau da ai rai nna, mung shawa dum nta hten hkra ai lam chye lu ai.
“Shana maga de hkying 3 daram hta kalang, Jan du wa mahka kalang wa jahkrat bun kau dai ai, mung shawa si hkala lam nga na re, anhte gadai mung shinggan de n gwi pru na hpa mung a tsawm rai n chye shi ai,” nga Sinli mare na mung shawa langai KNG de tsun dan ai re.
December 23 ya shani hta mung, Sinli mare kaba n tsa Myen hpyen dap nbungli hte gap gasat ai majaw, Sinli mung shawa tsi rung, hka wan jak kawng, hte mare kahtawng n kau na dum nta 20 jan hten hkrum wa ai hte, mung shawa marai 3 si nna, marai 10 daram hkala hkrum wa ai re.
Sinli mare kaba hpe lai wa sai November praw hta dingdung daw dap hpawm hpung ni htim gasat zing madu la lu sai rai tim, Myen hpyen dap maga de na ya na zawn shani shagu ngu na nbungli hte bawm wa jahkrat bun taw nga ai mung rai nga ai.
Sinli mare kaba makau grup yin hkan na mare uphkang salang ni yawng hpe shaga gahkyin la nna, Kokang uphkang hkrang masa lam hte seng nna, ahkyak ai lawng lam 6 hpe tsun jahpra dan ai lam ni mung galaw wa sai re.
1027 majan masing laman,Myen hpyen dap laknak kaba hte nbungli bawm a majaw, Sinli mare kaba na mung shawa marai 18 si hkrum sai rai nna, marai 30 jan hkala hkrum wa ai hte, mung shawa dum nta 200 daram hten ayai mat sai lam, dai ginra na wuhpung ni sawk gahkyin da ai sumtang laika hta tsun da ai re.
