Myitkyina-Putao lapran mawdaw gau ai mung shawa ni gaw ya ten sau manu tsaw rawt ai hte, shagyit ni grai law wa ai majaw, lam shagu hta yak hkak wa taw nga ai lam chye lu ai.
Ya ten Putao de kalang lung yang sau manu sen masum daram ma ai hta, shagyit ni grai law wa ai hte hpyen lahkawn ai lam ni a majaw, hkrun lam hkawm masha ni mung n nga wa ai majaw, mawdaw hkawm ai lam hpe jahkring kau ra wa ai masa re nga, dai ginra na mawdaw la langai KNG de n dai zawn tsun ai re.
“Lam de hpyen lahkawn ai re nga yang gadai nau n gwi hkan ai, dai majaw hkrun lam hkawm masha grai yawm mat ai, madung gaw jit jep na jit awng ai ni hpe nga yang shaga woi la kau ai, ngut na mung gunrai a ntsa hkawn kang hta ai majaw, mawdaw la ni na matu hpa n ngam ai,” nga ai re.
Ya ten hkrun lam hkawm ai mung shawa n nga ai daram byin taw nna, madung arai shagun ai ni hkrai sha re lam matut tsun dan ai re.
Myitkyina hte Putao lapran mawdaw kalang lung yang sen kru daram lu ai rai tim, gate ni hta jaw kau ra ai law ai hte, sau manu a majaw, mawdaw la ni a matu hpa n ngam ai lam Myitkyina hte Putao lam lapran mawdaw gau nga ai mawdaw la langai mung ndai zawn matut tsun ai re.
“Myitkyina kaw na Putao de lung na rai yang, sau manu sen masum ma ai, Mawdaw kalang lung yang sen kru daram lu ai, rai tim lam kaw jaw ra ai ma grai law ai, mawdaw la ni na matu hpa n ngam ai, n ngam ai majaw yawng jahkring wa ai ga rai nga ai,” nga tsun dan ai re.
Galaw lu galaw sha yak hkak nga ai ten, seng ang ai laknak lang rawt malan hpung ni hku na mung mawdaw hkawn hta ai lam hpe shayawm ya na hte, mung shawa ni shim shim lum lum hte wang lu wang lu wang lang hkawm sa na ahkang jaw ya na hpe mawdaw la ni hpyi shawn nga ma ai re.
Myitkyina Putao lam lapran rawt malan dap ni hkap ai shagyit 6 daram nga ai rai nna, mawdaw kaji langai hta 2,000 kaw na 8,000 du hkra htaw taw ai rai nna, kaga gunrai manu hta hkan nna, hta ai lam ni mung naw nga taw ai hpe chye lu ai.
Myen hpyen dap daru magam zing kau ai hpang, Myitkyina Putao lam lapran shagyit ni grau grau law wa taw nga ai rai nga ai.
