Mohka nbung laru a majaw, hten mat ai Maje ginwang, Aung Nan mare na hpaji awng ni hpe bai gram lajang la lu na matu garum ningtum ra ahkyak taw nga ai lam dai mare na lit nga ai ni kaw na chye lu ai.
Nbung laru a majaw hten mata ai hpaji jawng ni hpe, mare kanu kawa ni kaw na lai wa sai June shata hta, mai byin ai hku kawa hte gram lajang da ai rai tim, ya ten ngang kang ai jawng hpe galaw la lu na matu garum ningtum ra ahkyak taw nga ai lam, Aung Nan mare na jawng up saranum KNG shiga dap de ndai zawn tsun ai re.
“Moehka nbung hte hten mat ai jawng ni hpe rai n lu gram la shi ai, mi na nga ai hpri tsut ni hte sha mai byin ai hku gram lang taw nga ai, marang mung grai gayun ai, gawk ni mung grai kaji ai, gawk lahkawng masum na ma ni marawn sai nga yang, laga gawk na ma ni laika n mai sharin sai, dai hku mai byin ai hte sa taw ai ga rai nga ai,” nga tsun dan ai re.
Dai mare hta lawu tsang jawng lai, KG kaw na tsang 6 du hkra hpaw sharin taw ai rai nna, jawng ma yawng marai 43 nga ai lam chye lu ai.
Dai ning na jawng lung ladaw hpe shangut la lu na matu, jawng lang arung arai, Machyu chyang, hkret din, laika buk, sharin gin hpan hta lang ra ai arung arai ni, ra ahkyak taw nga ai lam chye lu ai.
Manje Aung Nan mare gaw, mare kaba ni hte tsan ai shara rai nna, ma ni hpe hkrai jawng kaba ni de sa lung shangun na yak hkak ai majaw, mare hta mai byin ai hku na sharin jahpat ya taw ai re.
Aung Nan mare gaw, Nmawk hte Deng 20 tsan ai mare kahtawng rai nna, madung bum yi hpe machyu shingbyi let, kan bau bungli galaw ai mare kahtawng rai nna, hting gaw 37 hte masha jahpan 220 daram nga ai mare kahtawng re lam chye lu ai.
