Jinghpaw-Saging jarit, Indaw ginwang, Mawlu balik dap hpe Wunpawng Mungdan Shanglawt Hpyendap hte PDF pawm hpawm hpung ni, sa htim gasat zing kau sai lam chye lu ai.
Myen hpyenla hte Balik hpyen n’gun marai 30-40 grup yin nga ai Mawlu balik dap hpe December 13 ya jahpawt, hking masum daram aten kaw zepzi zing kau lu sai ng anna, dai ginra, KIA magam gun langai KNG hpe tsun ai re.
“mahkra zep zi zing madu kau ai rai nga ai. dai balik dap hpe shang gasat na matu mani kaw na hkyen hpang wa ai dai hpawt hking masum hte hking mali lapran atsawm sha lu zing madu kau sai re”tsun dan ai re.
Mawlu balik dap hpe hking hkum mi laman hta shang htim gasat kau ai re lam chye lu ai.
Dap zing kau ngut ai hpang, jahpawt hkying 5 daram aten hta Myen hpyendap maga laknak kaba n hkring n sa gap bun ai sha n’ga, jet nbungli hte mung maja wa gap bun wa ai re.
“Monyin hpyen dap kaba kaw na laknak kaba hte gap bun ai. Hpri gang gap maga de na mung 105 MM hte gap bun ai lam galaw ai. bai n-na jet hte mung bai wa gap ai majaw shanglawt maga de na gan kalut kau da ra ai masa kaw re” nga nna, KIA magam gun wa matut tsun dan ai re.
Shawnglawt dap maga, dai balik dap hpe lu zing madu kau sai raitim, laknak kaba hte nbungli ding yang gap bun ai hta dai shara kaw nna gan hting nut da ai lam chye lu ai.
Majan hta Balik marai 6 daram hpe rim da ai rai nna, si hkala ai lam hpe gaw tup hkrak nchye lu shi ai re.
Bai nna, nbungli hte sa gap bun ai majaw, mung shawa marai 10 jan daram mung si hkala hkrum ai lam nga ai hpe mung chye lu ai re.
Ya ten si hkala hkrum ai mung masha ni hte, mare kata na hprawng pru ai mung masha ni nga hpe ginra mung shawa ni tsun dan ai raitim KNG kaw n-na kata lam shiga chye lu na matu sawk sagawn nga ding yang rai nga ai re.
By – Naw Htoi (Hugawng)
