Jinghpaw Mung hte Mungmyit Sinli ginra hta Phone-Internet line pat da ai shata mi jan wa nga sai majaw, mung shawa ni yawng yak hkak hkrum nga ai re.
Lai wa sai shata hta, Internet line loi li naw mai lang taw ai rai tim, ndai December shata kaw na gaw gara line hpe mung tsep kawp n mai yu mat ai lam, ginra masha langai KNG de ndai zawn tsun dan wa ai re.
“Lai wa sai shata gaw, Telenor (Atom) hte Phone mai set ai, line loi li mai yu ai, ndai December shata kaw na gaw, Teleno mung tsep kawp hpa mung n lu mat, MPT Phone loi li mai shaga ai ram sha rai mat sai,” nga tsun dan ai re.
Ya ten Jinghpaw mung hta MPT Phone line langai sha, Phone mai shaga taw ai rai nna, Internet line yawng tsep kawp hpa mung n lu taw ai re lam chye lu ai.
Internet line n lu mat ai majaw, Online hte bungli galaw taw nga ai ni hte Online Jawng lung taw nga ai ni yak hkak hkrum taw nga ai lam ginra masha langai ndai zawn matut tsun dan ai re.
“Online kaw na jawng lung taw nga ai re, ya online n lu mat ai majaw hpa mung n mai galaw, ya gaw hpa bungli mung n lu nta kaw dai hku sha nga taw, bungli tam mung n mu, gunrai manu gaw rawt, grai yak mat sai,” Myitkyina kaw jawng lung taw ai jawng ma langai KNG de tsun dan wa ai re.
Jinghpaw mung hta Intenet Phone line yawng pat kau ai lam gaw, Htichyaik hta majan gap gasat ai majaw, re nga mung shawa ni tsun ai rai tim, KNG kaw na laksan shateng lu ai lam n nga ai re.
