Kutkai Myen hpyen dap gap dat ai laknak kaba si a majaw, asak 3 ning re ma kaji langai asak si hkrum wa nna, kaga mung shawa marai 6 hkala sawng wa ai lam, ginra masha ni kaw nna chye lu ai.
December 9 ya hte 10 ya laman, Kutkai Myen hpyen byuha dap kawn na, Loi Seng mare de laknak kaba gap shadam bun ai majaw, ya na zawn si hkala ai lam byin wa ai re nga, dai ginra na mung shawa langai KNG de ndai zawn tsun dan ai re.
“ndai laman gaw shani shagu ngu na laknak kaba hkrat ai, ndai laman grau sawng wa ai ga rai nga ai, December 10 ya shana mare kata hkan wa hkrat ai, mare kata wa hkrat ai majaw, Ma langai si nna, marai 6 hkala sawng ai, hkala ai ni yawng gaw kaba ai ni rai ma ai,” nga tsun dan ai re.
Kutkai mare kaba makau grup yin hta Myen hpyen dap hte Balawng TNLA dap ni shani shagu ngu na majan laja taw nga nna, Myen hpyen dap hte Pyithutsit dap ni hpe Balawng dap ni htim gasat zing madu ding yang rai nga ai re.
Ya ten Kutkai mare mung shawa n kau tinang man ang ai shara ni de hprawng yen hkawm taw nga nna, dai ni a matu malu masha tsi mawan garum ningtum lam ni mung ra ahkyak taw nga ai re.
Mungmyit Sinli ginra hta 1027 majan masing hte htim shagrawt majan baw nga ai n htoi 40 ya jan wa ai ten, Myen hpyen dap a dap shara 200 jan hpe dap hpawm hpung maga de na zing madu da lu sai re.
