Mungmyit Sinli, Dingda ginwang ginjaw kata Balawng TNLA dap ni bawm hte hkap kapaw ai mabyin hta, Shanglawt magam gun marai 2 si mat ai nga, Namhpakka ginwang rung kaw nna chye lu ai.
November praw 5 ya shani, Namhpakka ginwang, Pang Kanai ninghtawn Uphkang rung na Salang Kaba Lasang Zau Mun Awng hte Latgyi Nhkum Awng Myat yan gaw hpyen masa lam hte seng na hkawm sa nga ai ten, Hka Lum kaw na Pang Hang de yu wa ai mare lapran kaw Remote Bawm hte hkap kapaw ai hta, asak si sum wa ai re lam, Namhpakka ginwang kawn Ginwang ginjaw de dang madun da ai laika kaw na mu chye lu ai re.
Dai magam gun yan gaw, December praw 5 ya shani Mung Wi Myen hpyen dap hpe bungli shang na matu Mung Wi makau grup yin hta nga taw ai Balawng TNLA hpyen hpung ni hpe shiga shana na matu sa wa ai hta, hkap kapaw hkrum ai re lam chye lu ai.
Ndai lam hte seng nna, KIA Shiga magam dap lithkam Dukaba Nhpang Naw Bu hpe san yu yang, “ndai lam hte seng na shiga gaw na ai, kade daram teng ai gara hku byin ai ngu hpe matut sagawn taw nga ai,” nga tsun ai re.
Balawng TNLA dap maga de na lit nga ai ni hpe KNG shiga dap na, ndai lam hte seng na san shaga yu yang, ndai lam hpe hpa shiga rai n na shi ai lam tsun wa ai re.
Mungmyit Sinli ginra hta, Kokang MNDAA hte Balawng TNLA dap ni kaw na, KIA magam gun ni hpe mara kata hkap zingri sat ai mabyin lam ni jakring hkring byin nga ai a n tsa, ginra masha ni myit tsang nga ai re.