Shingbwi yang ginwang, Dalu mare Myen hpyen dap post hpe KIA Dung 14 ni November 28 ya shani sa htim gap gasat zing kau lu ai lam, shawng lam hpyen shi sawk ni kaw nna chye lu ai.
Dalu mare, Myen hpyen dap Hk.L.Y (86) the Hk.M.Y (347) dap ni dung ai dap shara hpe htim gap gasat zing kau ai hpang, Myitkyina de na lung wa ai Myen hpyen Jet Fighter nbungli 2 hte wa gap bun ai re.
Dai shara hpe htim gasat zing madu la lu ai lam teng ai rai tim, laknak machyu pala kade daram zing madu la lu ai ngu hpe a tsawm tup hkrak rai nchye lu ai lam tsun ai re.
Ya htim gasat zing kau lu ai Dalu Daga mare Jamaw hta Myen hpyen dap kaw na lai wa sai shata mi daram kaw na, hka lam hpe pat kau ai majaw, dai ginra na mung shawa ni lam shagu hta grai yak hkak nga ai re lam chye lu ai.
Matut na rai tim, November 27 ya shani hta mung Mungmyit Sinli Mung Hawm ginra Shang Shin Chyai Myen hpyen dap hpe, KIA Dung 2 ni sa htim gap gasat zing madu kau lu ai lam chye lu ai.
