Hugawng, Danai Shingbwi Yang ginwang, Talu mare hte Taka mare de sa ai, Hkalung hka lam hpe Myen hpyen dap pat da ai n htoi 10 ya jan na wa ai majaw, dai ginra na mung mare masha ni yak hkak taw nga ai re.
Jamaw ginra rai nga ai, Talu, Taka mare de sa ai hkalam hpe lai wa sai November praw 8 ya shani kaw na pat kau ya ai majaw, ja maw ginra hta, sau, n-gu dum hprut taw nga sai lam, dai ginra na mung shawa langai KNG shiga dap de tsun dan ai re.
“Madung dai ginra de gaw, Hkalung hka lam dai langai hpe sha machyu let, galaw lu galaw sha ai shara rai nga ai, ya hte KIA hte jahkring gap hkat ai kaw na pat mat ai, ya du hkra n hpaw ya ai, dai majaw mung shawa ni grai yak hkak wa taw nga ai,” nga tsun dan ai re.
Dai ginra hta lai wa sai November praw hta Myen hpyen dap hte KIA dap majan gap gasat wa ai kaw na, ya na zawn hkrun lam pat kau ya ai re lam matut chye lu ai.
Dai ginra na mung shawa ni gaw, madung Jaw Maw hpe machyu let kan bau bungli galaw ai shara re lam chye lu ai.
