Manmaw, Nyaung Pin lawk, Aung Thiri ja seng hta, gumhpraw sen mun mi jan manu dan ai ja rai yawng damya mya hkrum ai lam chye lu ai.
Dai hpawt hkying 8 daram aten, myi man magap da ai La marai 6 Sengke masum hte sa wa nna, dai seng madu hpe sinat hte sa madi jahkrit da nna, ja rai yawng damya sa mya mat wa ai nga, dai seng na magam gun langai KNG shiga dap de tsun dan ai re.
“Sinat kadun hte shang wa nna, gadai mung hkum shamu nga tsun ai, ngut na sinat masum lang gap kapaw jahkrit ai, dai hpang seng madu Jan hpe la lahkawng sinat hte madi da nna dip taleng da ai.” nga tsun dan ai re.
Dai damya sa mya mat wa ai ni gaw, gara kaw na kadai re ai ngu hpe n chye lu dat ai rai tim, CCTV matsing sumhting nga ai lam, chye lu ai.
Dai hpawt jau seng madu hte gat dut num marai 7 sha naw du ai ten sa mya mat wa ai rai nna, ya ten Manmaw balik dap de amu shawk da ai re lam chye lu ai.
Myen hpyen dap daru magam zing kau ai hpang, Jinghpaw mung shara shagu hta dai zawn damya mya ai amu mang hkang ni jahkring hkring byin pru nga ai re.